सोताङ गाउँपालिका ३ ले गर्याे, एक आर्थिक वर्षमा ३ लाख बढी राजश्व संकलन

साउन १०, सोलुखुम्बु । सोताङ गाउँपालिका वडा नम्बर ३ ले एक आर्थिक वर्षमा ३ लाख बढी राजश्व सङ्कलन गरेको छ । वडा कार्यालयले गत साउन महिनादेखि गएको असार मसान्त सम्म विभिन्न शीर्षकमा ३ लाख २४ हजार ५ सय ९४ रुपैयाँ राजश्व सङ्कलन गरेको हो ।

सोताङ गाउँपालिका वडा नम्बर ३ का वडा अध्यक्ष गोकर्ण बस्नेतका अनुसार भूमिकर (मालपोत) मार्फत ६१ हजार ५ सय ६५ रुपैँया, वहाल कर १० हजार ५ सय ४ रुपैँया, सिफासि दस्तुर १ लाख १३ हजार ८ सय २५ रुपैँया र व्यक्तिगत घटना दर्ता दस्तुर मार्फत ३३ हजार २ सय रुपैँया राजश्व संकलन गरेको छ ।

यस्तै नाता प्रमाणित दस्तुर मार्फत ३ हजार ५ सय, व्यवसाय रजिष्ट्रेशन दस्तुर,३ हजार ५ सय, अन्य दस्तुर १ सय र अन्य राजश्वमा ६ हजार ९ सय रुपैँया राजश्व संकलन भएको छ । वडाले अनलाइन मार्फत गाउँपालिकाको खातामा रकम दाखिला गरिसकेको जनाएको छ । वडा कार्यालयले गत आर्थिक वर्ष २०७९/०८० मा १ लाख ६१ हजार हाराहारीमा राजश्व संकलन गरेको थियो । गत तुलनामा यस वर्ष सेवा प्रवाह प्रभावकारी भएकाले वडा राजश्व बढी संकलन भएको वडा अध्यक्ष बस्नेतले जानकारी दिनुभयो ।