सोलुखुम्बुका ४ पालिकाले सके भूमी वर्गीकरणको काम, अव बाँकी ४ पनि छिट्टै सम्पन्न गर्दै  

साउन २१, सोलुखुम्बु । हिमाली जिल्ला सोलुखुम्बुका ४ वटा पालिकामा भूमि वर्गीकरण सम्पन्न भएको छ ।  भु उपयोग नियमावली २०७९ बमाेजिम जिल्लाका ८ पालिका मध्य. हाल सम्म ४ वटा पालिकाले भूमि वर्गीकरण सम्पन्न गरेको जिल्ला मालपोत कार्यालय सोलुखुम्बुले जनाएको छ ।

 नियमावलीले विभिन्न १० वटा आधार तय गर्दै भूमि वर्गीकरण गर्ने भनिएको आधारमा जिल्लाका ४ वटा पालिकाले भूमि वर्गीकरण गरिसकेका कार्यालयका प्रमुख विदेश खनालले जानकारी दिनुभयो । हाल सम्म जिल्लाका नेचासल्यान गाउँपालिका, खुम्बु पासाङ ल्हामु गाउँपालिका, सोलुदुधकुण्ड नगरपालिका र थुलुङ दुधकोशी गाउँपालिकाले भूमी वर्गीकरणको काम सम्पन्न गरिसकेको उहाँको भनाई छ ।  

अव माप्य दुधकोशी, सोताङ, लिखुपिके र महाकुलुङ गाउँपालिकाले वर्गीकरणको काम सम्पन्न गर्न बाँकी रहेको छ ।  यि बाँकी पालिका मध्ये महाकुलुङ गाउँपालिकाले वर्गीकरणको काम सम्पन्न गर्ने चरणमा रहेको पनि उहाँको भनाई छ । भू उपयोग नियमावलीका अनुसार भूमिलाई कृषि क्षेत्र, आवासीय क्षेत्र, व्यवसायिक क्षेत्र, औद्योगिक क्षेत्र, खानी तथा खनिज क्षेत्र, वन क्षेत्र, नदि खोला तथा सिमसार क्षेत्र, सांस्कृतिक तथा पुरातात्विक महत्वका क्षेत्र र नेपाल सरकारबाट आवश्यकता अनुसार तोकिएका अन्य क्षेत्र गरि जम्मा १० प्रकारमा वर्गीकरणको आधार तय गरिएको छ ।

यिनै आधारमा रहेर पालिकाहरूले भूमि वर्गीकरण गरेको र सोको जानकारी कार्यालयमा गराएको प्रमुख खनालको भनाई छ ।  भूमिको प्रकृति हेरेर सोही बमाेजिम प्रयोग गर्नेका लागी सरकारले सुरु गरेको वर्गीकरणको कामका लागी अहिले पालिकाहरूले काम गरिरहेका छन् ।