खुम्बु अपडेट : रक्षामन्त्रीसहितको टोली निरीक्षणमा आउँदै

भदाै १, साेलुखुम्बु ।  सोलुखुम्बुको  माथिल्लाे बेल्ट  खुम्बु पासाङ ल्हामु गाउँपालिका–५ थामे खोलामा आएको बाढीले सोलुखुम्बुको माथिल्लो र तल्लो तटीय क्षेत्रमा कटान जारी रहेको छ । शुक्रवार दिउँसो २ बजे थामे खोलामा आएको बाढी पछि खुम्बु र तल्लो सोलुका नदी आसपासका क्षेत्रमा कटान जारी रहेको जिल्ला प्रहरी कार्यालय सोलुखुम्बुले जनाएको छ ।

प्रहरी निरीक्षक लक्ष्मण गिरीका अनुसार नदीमा पानीको बहाब केही कमि भएपनी कटान भने जारी रहेको छ । बाढीले खुम्बु पासाङ ल्हामु गाउँपालिका –५ थामेका २० घर तथा होटल लज, एक स्वास्थ चौकी र विद्यालय बगाएको थियो ।

बाढीले स्थानीय विद्युत आयोजनाको ड्याम पुर्ण रुपले क्षतिग्रस्त बनेको छ भने खुम्बु पासाङ ल्हामु गाउँपालिका ३ स्थित फाक्दिङ देखि नाम्चे जामे करिब २०० मिटर पदमार्ग कटान गरेको स्थानीयले बताएका छन् ।

त्यहाँ उद्दारका लागि नेपाली सेना र नेपाल प्रहरी सक्रिय भएको जिल्ला प्रहरी कार्यालयका प्रहरी नायब उपरीक्षक द्वारिका प्रसाद घिमिरेले जानकारी दिनुभयो ।

नेपाली सेना र प्रहरीले थामेबाट ९३ जनालाई उद्दार गरि आर्मी क्याम पछाडिको घरमा राखिएको छ भने ४२ जनालाई स्थानीय सामुदायिक भवनमा राखिएको प्रहरी नायब उपरीक्षक घिमिरेले बताउनुभयो ।

बाढीले तल्लो सोलुको तटीय क्षेत्रमा पनि अस्सर गरेपछि माप्यदुधकोशी गाउँपालिका ६ का ५ घर परिवारलाई प्रहरीले अन्यत्र स्थानान्तरण गरेको छ । उक्त बाढी भोटेकोशी हुँदै दुधकोशीमा मिसिदा सोलुखुम्बुको तल्लो क्षेत्रमा पर्ने माप्य–खुम्बु मितेरी पक्की पुलमा क्षती पुगेको छ ।बाढीले कोशी आसपासका क्षेत्र कटान गर्दा जिल्लाको खुम्बु पासाङ ल्हामु गाउँपालिका र माप्यदुधकोशी गाउँपालिका जोड्ने दुधकोशी नदी माथीको पाकी मोटरेबल पुलमा सवारी सन्चालन गर्न नमिल्ने गरि क्षति पुगेको जिल्ला प्रहरी कार्यालय सोलुखुम्बुले जनाएको छ ।

पुलमा क्षती पुगेसँगै सल्लेरीबाट खुम्बु सन्चालन हुँदै आएको सिधा सडक संजाल समेत टुटेको बताइएको छ । प्रहरी नायब उपरीक्षक द्वारिका प्रसाद घिमिरेका अनुसार  बाढीले जिल्लाको तल्लो क्षेत्रमा पनि क्षती पुर्याएको खबर छ ।सोताङ र थुलुङ दुधकोशी जोड्ने दिप्लीघाट स्थित दुधकोशी नदी छेउमा राखिएको बेलीबृजको सामान बगाएको छ, नदी आसपासका बस्तीमा पनि सामान्य क्षती पुगेको छ । बाढीको कारण बारे खुल्न सकेको छैन ।

खुम्बुको मानवरहित क्षेत्रबाट सुरु भएको उक्त बाढी हिमताल फुटेर आएको हुन सक्ने सगरमाथा प्रदुषण नियन्त्रण समितिका अध्यक्ष लामाकाजी शेर्पाले बताउनुभयो ।हिमताल बस्तिबाट टाढा पर्ने भएकाले कुन हिमताल फुट्यो भन्ने यकिन नभएको उहाँको भनाइ छ । आएको बाढी ग्रस्त क्षेत्रको निरीक्षणमा रक्षामन्त्रीसहितको टोली आउँने हुनुभएको छ ।

शुक्रवार एक्कासी थामे खोलामा आएलो बाढीले गाउँ नै बगाएको उक्त स्थानको स्थलगत निरीक्षणमा रक्षामन्त्री मानवीर राईसहित विपत व्यवस्थापन समितिको टिम आउने हुनुभएको हो ।उहाँहरु नेपाली सेनाको हेलिकप्टर मार्फत सोलुखुम्बु आउने प्रमुख जिल्ला अधिकारी देवी पाण्डे(खत्री)ले जानकारी दिनुभयो ।