सोलुखुम्बुमा ४५ करोड रकम फ्रिज

भदौ १, सोलुखुम्बु । हिमाली जिल्ला सोलुखुम्बुमा गत आर्थिक वर्ष २०८०/८१ मा करिब ४५ करोड रकम फ्रिज भएको छ । गत आर्थिक वर्षमा बिनियोजित बजेट मध्ये चालु तर्फको ४४ करोड ९९ लाख १७ हजार ४ सय ३१ रुपैयाँ ५७ पैसा अर्थात् १० प्रतिशत रकम फ्रिज भएको कोष तथा लेखा नियन्त्रक कार्यालय सोलुखुम्बुका सूचना अधिकारी नवीन राईले जानकारी दिनुभयो ।

सोलुखुम्बुको प्रदेश तर्फको कुल ४८ करोड ९४ लाख ८१ हजार बजेट मध्ये ४२ करोड २८ लाख ५ हजार ३ सय ५८ रुपैयाँ २ पैसा खर्च हुँदा, ६६ लाख ६७ हजार ५ सय ६४ रुपैयाँ ८ पैसा रकम खर्च नभएर फ्रिज भएको कार्यालयको तथ्याङमा उल्लेख गरिएको छ ।

यस्तै सङ्घ तर्फ आर्थिक वर्ष २०८०।८१ मा चालु तर्फ तीन अर्ब ८५ करोड दुई लाख ८४ हजार चार सय ३३ रुपैयाँ र पूँजीगततर्फ १३ करोड १६ लाख ५१ हजार गरी तीन अर्ब ९८ करोड १९ लाख ३५ हजार चार सय ३३ रुपैयाँ प्राप्त भएकोमा ३ अर्ब ५९ करोड ८६ लाख ९३ हजार ६ सय ४२ रुपैयाँ २३ पैसा रकम खर्च भएर ३८ करोड ३२ लाख ४१ हजार ७ सय ९० रुपैयाँ ७७ पैसा रकम फ्रिज भएको कोष तथा लेखा नियन्त्रक कार्यालयका सूचना अधिकारी राईले जानकारी दिनुभयो ।

चालु तर्फका बजेट खर्च नहुनुमा जिल्लाको सरकारी कार्यालयहरूमा दरबन्दी अनुसारको कर्मचारी नहुँदा उनीहरूको तलब नै उक्त फ्रिज भएको कार्यालयले जनाएको छ ।