चट्याङ लागेर एक महिलाको मृत्यु,आमाछोरी घाइते

भदौ ११, सोलुखुम्ब । सिन्धुलीको हरिहरपुरगढीमा चट्याङ लागेर एक महिलाको मृत्यु भएको छ । सोमबार साँझ परेको चट्याङ लागेर हरिहरपुरगढी गाउँपालिका वडा नम्बर–१ शिखर बस्ने छलिमाया थिङको मृत्यु भएको हो ।

जिल्ला प्रहरी कार्यालय सिन्धुलीका अनुसार हरिहरपुरगढी–३ माडी स्थित खेतमा धान गोड्ने क्रममा चट्याङ लागेर हरिहरपुरगढी–१ शिखरकी ४० वर्षीया थिङको घटनास्थलमा नै मृत्यु भएको हो । चट्याङ लागेर अन्य २ जना घाइते भएका छन् ।

प्रहरीका अनुसार घाइते हुनेमा हरिहरपुगढी–१ शिखर बस्ने वर्ष ४० वर्षीया लुकुमाया रुम्बा र उनकी छोरी १८ वर्षीया सुशिला रुम्वा रहेकी छिन् । चट्याङ लागेर लुकुमायाको दाहिने खुट्टा, जिउ, टाउको र मुटु दुख्ने समस्या देखिएको छ भने सुशिलाको कान नसुन्ने, टाउको, शरिर दुख्ने समस्या देखिएको छ ।

उनीहरुको अवस्था मध्यम रहेको र मकवानपुरस्थित लामा पोलिक्लिनिक्समा उपचार भइरहेको प्रहरीले जनाएको छ । घटनास्थल इलाका प्रहरी कार्यालय कपिलाकोटबाट ४० किलोमिटर पश्चिम पर्दछ ।