रेडक्रस सोलुखुम्बुले मनायो ६२ औं स्थापना दिवस

भदौ १९, सोलुखुम्बु । नेपाल रेडक्रस सोसाइटी सोलुखुम्बुमा ‘मानवतालाई जीवित राखौँ’ भन्ने नाराका साथ आज ६२औँ स्थापना दिवस मनाइएको छ । बुधवार जिल्ला शाखाका सभापति रामकाजी श्रेष्ठको अध्यक्षता तथा  नेपाल लाईफ इन्स्योरेन्स कम्पनी शाखा कार्यलय सोलखुम्बुुका प्रबन्धक प्रकाश बाबु कार्कीको प्रमुख आतिथ्यता स्थापना दिवस मनाइएको हो ।

दिवसको अवसरमा जिल्ला शाखाले विभिन्न कार्यहरुमा सहयोग गर्दै आएको भन्दै नेपाल लाईफ ईन्स्योरेन्स कम्पनीलाई सम्मान समेत गरेको छ । नेपाल रेडक्रस सोसाइटीले नेपाल सरकारको नीति तथा कार्यक्रम अनुरूपका विपद् व्यवस्थापन, स्वास्थ्य सेवा र अन्य सेवामूलक गतिविधिहरूमा सहयोगी भूमिका निर्वाह गर्दै आएको नेपाल रेडक्रस सोसाइटी जिल्ला शाखाका कोषाध्यक्ष सुरेश खड्काले जानकारी दिनुभयो ।

वि.सं. २०२० साल भदौ १९ गते रेडक्रस अभियानको अंगको रूपमा नेपाल रेडक्रस सोसाइटीको स्थापना भएको थियो । मानवीय संस्थाका रूपमा रहेको नेपाल रेडक्रसमा १२ लाखभन्दा धेरै स्वयंसेवक मानवीय सेवाको कार्यमा सक्रिय रहेका छन् । कोषाध्यक्ष खड्काका उहाँका अनुसार रेडक्रसको सात वटा प्रदेश समिति, ७७ जिल्ला शाखा, एक हजार छ सय १५ उपशाखा, एक सय २० सहयोग समिति र ६ हजार ९ सय ३४ जुनियर तथा युवा सर्कलसहितको साङ्गठनिक संरचना रहेका छन् ।

रेडक्रस तथा रेडक्रिसेन्ट सोसाइटीको अन्तर्राष्ट्रिय महासङ्घ र रेडक्रसको अन्तर्राष्ट्रिय समितिको सदस्य संस्थाका रुपमा स्थापना भई देशभर मानवीय सेवाका काम गर्दै आएको छ । रेडक्रसले सङ्गठन विकास, जुनियर तथा युवा विकास, विपद् तथा सङ्कट व्यवस्थापन, सामुदायिक विकास, लैङ्गिक तथा समावेशीकरण, मानवीय मूल्य तथा रेडक्रस सिद्धान्तहरूको प्रवर्द्धन, स्वास्थ्य सेवा, रक्तसञ्चार सेवाजस्ता गतिविधि देशैभर सञ्चालन गर्दै आएको छ ।