थामे बाढी पीडितलाई थुलुङ दुधकोशी गाउँपालिकाले ५ लाख रुपैयाँ सहयोग गर्ने

भदौ १९, सोलुखुम्बु । सोलुखुम्बुको थुलुङ दुधकोशी गाउँपालिकाले खुम्बु पासाङल्हामु गाउँपालिकाका बाढी प्रभावितलाई ५ लाख रुपैयाँ सहयोग गर्ने भएको छ । थामे बाढी प्रभावितलाई राहत र पुनर्स्थापना गर्न गाउँपालिकाको कोषमा राहत रकम उपलब्ध गराउने निर्णय भएको गाउँपालिकाले जनाएको छ ।

थुलुङ दुधकोशी गाउँपालिकाका अध्यक्ष असिम राईको अध्यक्षतामा बुधबार बसेको बैठकले यस्तो निर्णय गरेको हो । गाउँपालिका प्रवक्ता भोजराज कार्कीका अनुसार खुम्बु पासाङ ल्हामु गाउँपालिका मार्फत उक्त रकम हस्तान्तरण हुनेछ । विपतमा परेकाहरुलाई सहयोग गर्नु मानवीय धर्म भएकाले गाउँपालिकाले सहयोग गर्ने निर्णय गरेको पालिका अध्यक्ष असिम राईको भनाइ छ । यस्तै सोही बैठकले थुलुङ दुधकोशी गाउँपालिकाका कर्मचारीहरूको मुख्य नतिजामा आधारित कार्य् विवरण प्रतिवेदन, २०८१ तर्जुमा भई स्वीकृत गरेको छ ।

थुलुङ दुधकोशी गाउँ कार्यपालिका (कार्यसम्पादन) नियमावली, २०७४ को नियम १८ लाई प्रभावकारीरूपमा कार्यान्वयन गर्न मिति २०८१ साउन  २९ गतेको कार्यपालिकाको निर्णयानुसार गाउँपालिका अध्यक्ष असिम राई र प्रमुख प्रशासकीय अधिकृत प्रशन्न दीप राईबीच कार्यसम्पादन सम्झौता भइसकेको छ ।

सबै विभाग/महाशाखा÷शाखा तथा वडाबाट थप प्रभावकारी सेवा प्रवाह गर्न र कर्मचारीहरूलाई थप जिम्मेवार बनाउन शाखा प्रमुख लगायत अन्य कर्मचारी र प्रशासकीय अधिकृतबीचको कार्य सम्पादन सम्झौता गर्न गाउँपालिका अध्यक्षको निर्देशन दिनुभएको प्रमुख प्रशासकीय अधिकृत प्रशन्नदीप राईले बताउँनुभयो ।

३२ साउनमा खुम्बुको थामेमा हिमपहिरो विस्फोट हुँदा गेग्रान र ढुंगा सहित आएको बाढीले एउटा विद्यालय, एउटा स्वास्थ्य चौकी, २ वटा होटल, १३ वटा घर पूर्ण र १० वटा घर आंशिक रूपमा क्षति भएको थियो । ९५० किलोवाट क्षमताको जलविद्युत् परियोजनामा समेत क्षति पुगेको थियो ।