हाइड्रोको जोखीमयुक्त संरचनाका कारण साल्मेबासीमा तनाव भएको भन्दै रक्षामन्त्रीको ध्यानाकर्षण 

भदौ २०, सोलुखुम्बु  । जलविद्युत आयोजना सञ्चालन स्थलमा हुन सक्ने दुर्घटनाले साल्मेबासीमा मानसिक तनाव बढेको भन्दै साल्मेबासीले रक्षामन्त्रीलाई ध्यानाकर्षण गराएका छन् ।  अपर सोलु हाइड्रो पावर लिमिटेडले संरचनाका कारण साल्मेबासीले भययुक्त वातावरणमा बाँचिरहनुपरेको भन्दै उक्त विषय प्रति तल्लो गार्मा, माथिल्लो, साल्मे र तल्लो साल्मेबासीका तर्फबाट प्रतिनिधीहरु मन्त्रालय पुगेर बुधबार रक्षामन्त्री मानवीर राईको ध्यानाकर्षण गराएको हुन ।

 कम्पनीले बिच्छ्याएको पेनस्टक पाइप फुट्न सक्ने भयका कारण साल्मेबासी मानसिक रोगी समेत हुनुपरेको भन्दै सोलुखुम्बुका पूर्व जिल्ला उपसभापति समेत रहनुभएका प्रेम कुमार श्रेष्ठको नेतृत्वमा मन्त्रालय पुगेको टोलीले भय रहित वातावरणमा बाच्ने व्यवस्था मिलाइदिन रक्षा मन्त्री राईलाई अनुरोध गरेको छ । आयोजना प्रभावितहरुको विपद रोकथाम, न्युनिकरण तथा व्यवस्थापन सम्बन्धी जनगुनासोलाई आयोजनाले हदै सम्मको वेवास्ता गरेको भन्दै टोलीले मन्त्रालयमार्फत पहल गरि भय रहित वाताबरणमा बाच्न पाउने अधिकारको सुनिश्चितता तथा दीर्घकालिक सुरक्षाको व्यवस्था गर्न माग गर्दै ध्यानाकर्षण गराइएको अभियन्ता राजकुमार प्रधानले बताउनुभयो ।

 हिमताल फुटेर गत साउन ३२ गते थामे बगाएको घटना ताजै रहेको भन्दै २३ दशमलव ५ मेगावाट क्षमता विद्युत उत्पादन गर्ने अपर सोलु इलेक्ट्रिक कम्पनीको पेनस्टक फुटे त्यो भन्दा जर्जर अवस्था हुने भन्दै साल्मेबासीले मन्त्री राईलाई स्मरण गराएको प्रधानको भनाई छ ।  मन्त्रालय पुगेर ध्यानाकर्षण गराउने टोलीमा प्रेम कुमार श्रेष्ठ, नगेन्द्र कुमार श्रेष्ठ,  किसन श्रेष्ठ,  भीम कमारी प्रधान, राजकुमार प्रधान,  भूप ध्वज कार्की र  विनय कार्की सम्मीलित हुनुहुन्थ्यो  ।