अबैध वैदेशिक रोजगारमा पठाउन पालिकाको संलग्नता छैन – माप्य दुधकोशी पालिका

१६ मंसिर , साेलुखुम्बु । विगत केही दिन यता माप्यदूधकोशी गाउँपालिका र पालिका अध्यक्ष बुद्धिकिरण राईको नाम जोडेर सामाजिक संजालमा आएका सुचना हरुको भ्रामक भएको भन्दै गाउँपालिकाले खण्डन गरेको छ । गाउँपालिकाका केही व्यक्तिहरुले कोरिया पठाउने नाममा पालिका नेतृत्वले युवाहरूबाट अबैध रकम अशुली गरेको कुरालाई सामाजिक सञ्जालमा लेखेसँगै पालिकाले विज्ञप्ति नै निकालेर उक्त कुराको खण्डन गरेको हो ।

गाउँपालिका अध्यक्ष बुद्धि किरण राईले विज्ञप्ति मार्फत पालिकाले सदैव जनपक्षीय मात्रै काम गरेको भन्दै ब्यक्तिगत लाभको केही पनि काम नगरेकाले अनर्गल प्रचारबाजी पछि नलाग्न पालिका बासीलाई अनुरोध गरेका छन् । उनले विगतमा पनि राम्रा काम गर्दा आलोचना खेप्नु परेको भन्दै राजनितिक र सामाजिक प्रगतिदेखि आत्तिएका हरुले भ्रममा राजनीति गर्न खोजेको आरोप लगाएका छन् ।

पालिकाले कुनै पनि युवालाई अबैध तरिकाले बैदेशिक रोजगारमा पठाउनका लागि संलग्नता नजनाएको विज्ञप्ति मार्फत स्पष्ट पारिएको छ । साथै पालिकाका जनप्रतिनिधिले कानुन र जिम्मेवारी भन्दा बाहिर रहेर कुनै पनि काम नगर्ने पालिका अध्यक्ष राईले बताएका छन् । यस अघि विभिन्न ब्यक्ति तथा राजनैतिक दलहरुले अबैध कामदार पठाउन पैसा असुलिएको भन्दै पालिका नेतृत्वको आलोचना गरेका थिए ।