पर्यटन सिजन सकिए सगैँ धमाधम फर्किदैँ पर्यटकहरु

मंसिर २९, सोलुखुम्बु । पर्यटकीय सिजन सकिँदै गएपछि सोलुखुम्बुको माथिल्लो क्षेत्रबाट विदेशी पर्यटकहरू धमाधम फर्कन थालेका छन् । तापक्रममा कमी आएसँगै विश्वको सर्वोच्च शिखर सगरमाथा लगायत अन्य मनोरम दृश्यावलोकन गर्न आउने पर्यटक दिन प्रतिदिन फर्कन थालेपछि पर्यटकीय खुम्बु क्षेत्र रित्तिन थालेको हो ।

हवाई मार्ग प्रयोग गरी आउने पर्यटकहरूका कारण तेञ्जिङ हिलारी विमानस्थलमा फर्कनेको सङ्ख्या दिन प्रतिदिन बढिरहेको जिल्ला प्रहरी कार्यालय सोलुखुम्बुले जनाएको छ ।

जिल्ला प्रहरी कार्यालय सोलुखुम्बुका प्रहरी प्रमुख एवंम प्रहरी नायव उपरीक्षक द्धारिका प्रसाद घिमिरेका अनुसार सबै भन्दा बढी पर्यटकिय सिजन असोज २१ गते ५४ हवाई मार्गबाट लुक्ला एरपोर्टमा विभिन्न निजि एयरलाइन्सले विदेशी ४ सय ४५ जना पुरुष र ३ सय २५ जना महिला गरी कुल ७ सय ७० जना विदेशी पर्यटक भित्रिएको जनाइएकाे छ ।
यस्तै, आज शनिबार मात्रै ८ वटा हवाई मार्गबाट १७ पुरुष, १० महिला गरी कुल २७ जना विदेशी पर्यटक भित्रिएको प्रहरीले जनाएको छ ।‘ट्रेकिङ सिजन सुरु भएसँगै लुक्ला पुगेका जिल्ला तथा अन्य विभिन्न भागका पर्यटन व्यवसायीहरू सबै फर्किएका छन् । कात्तिकको अन्त्यमा सिजन सकिएको भए पनि मङ्सिर भरि पनि पर्यटकको हल्का आवतजावत हुने गर्दछ ।

नेपालमा पर्यटन व्यवसाय उद्योगका रूपमा सन् १९५० को दशकमा सुरुआत भएको मानिन्छ । नेपालले विदेशी पर्यटकका लागि आवागमनको ढोका खोलेसँगै विदेशी पर्यटकहरूको चहलपहल सुरु भएको हो । सरकारले नेपालका उच्च हिमशृंखला आरोहणका लागि खुला गरेसँगै विदेशी पर्वतारोही सगरमाथासहित आठ हजार मिटर अग्ला हिमाल आरोहण गर्न आउन थालेका हुन् ।

नेपालको पर्यटन क्षेत्रले पछिल्लो एक दशकमा दुई ठूला चुनौती र समस्यासँग जुध्नुपर्‍यो । २०७२ सालको भूकम्प र कोभिड–१९ का कारण पर्यटन क्षेत्रमा ठूलो धक्का पुग्यो ।तर पछिल्लो समय भने पर्यटन उद्योगले कोभिडबाट उत्पन्न चुनौती पन्छाउँदै सुधार र अनुकूलनको चरणमा प्रवेश गरेको छ । पछिल्लो दुई वर्षमा विदेशी पर्यटकको आवागमनले सुधारको छनक देखिएको प्रस्टै छ ।

नेपालमा प्रदेशस्तरमा पनि पर्यटनको विकासको उच्च सम्भावना छ । सात प्रदेशमध्ये हरेकका आआफ्नै विशिष्ट आकर्षण छन् । त्यसलाई पनि सही ढंगले प्रचारप्रसार गर्न सकेको खण्डमा पर्यटन क्षेत्रले ठूलो लाभ लिन सक्ने देखिन्छ ।