केपिलासगढीमा शैक्षिक क्षेत्रले फड्को मार्दै छ : उपाध्यक्ष गुरुराज राई

बैशाख १८, सोलुखुम्बु । खोटाङको केपिलासगढी गाउँपालिकाका उपाध्यक्ष गुरुराज राईले पालिकामा शैक्षिक क्षेत्रमा उल्लेखनीय सुधार आएको बताउनुभएको छ । बिहिबार रेडियो एभरेष्ट सँग कुराकानी गर्दै उहाँले शैक्षिक विकासको लागि पालिकाले विभिन्न पहल गर्दै आएको र यसले युवा पुस्तामा सकारात्मक प्रभाव पारिरहेको उल्लेख गर्दै उहाँले केपिलासगढी गाउँपालिकामा शैक्षिक स्तरमा ठूलो फड्को मारिएको बताउनुभयो ।

जब सम्म गाउँपालिका शिक्षित हुँदैन तबसम्म कुनै विषयमा फड्को मार्न सकिदैन भन्दै निर्वाचित भएको पहिलो बर्षमा नै शिक्षा क्षेत्रमा सबैभन्दा बढी बजेट विनियोजन गरी काम गरिएको उपाध्यक्ष राईले उल्लेख गर्नुभयो । जसमा कक्षा १ देखि कक्षा ५ सम्मको विद्यार्थीहरुलाई नि ः शुल्क अभ्यास पुस्तिका उपलब्ध गराएको भन्दै यस्तो काम गर्नेमा ७ सय ५३ वटा स्थानीय तह मध्येकै पहिलो स्थानीय तह केपिलासगढी गाउँपालिका बनेको उहाँले दाबी गर्नुभयो ।

वि.स २०७९ सालमा आफुहरु निर्वाचित भइसकेपछि पालिका भित्र रहेका ३७ वटा विद्यालयको भौतिक संरचाना निर्माण गरिएको, विद्यालय घेराबारमा लगानी गरिएको, विद्यालयमा खेल मैदानको आवश्यक रहेकाले निम्न कामहरुलाई जोड दिइरहेको उपाध्यक्ष राईको भनाई छ । यस्तै शिक्षालाई झन् प्रभावकारी बनाउनका लागि प्रत्येक बर्ष एसइईमा उत्कृष्ट अकं ल्याउने विद्यार्थीलाई पुरस्कृत गर्दै आइएको छ, भने विद्यालयका प्रध्यानाध्यापक, विव्यस र शिअसका पदाधिकारीहरुलार्य तालिमको व्यवस्था गरिएको औंल्याउनुुभयो । गाउँपालिकाले आर्थिक विपन्न तथा अभिभावक विहिन विद्यार्थीहरुलाई नि : शुल्क शिक्षा दिइएरहेको उपाध्यक्ष राईले बताउनुभएको छ ।