साँढे ३ करोडको लागतमा सोलुदुधकुण्डमा खुल्यो नुम्बुर प्राविधिक शिक्षालय, ३ विधामा नि : शुल्क शिक्षा

बैशाख १८, सोलुखुम्बु । हिमाली जिल्ला सोलुखुम्बुको सोलुदुधकुण्ड नगरपालिकामा करिब साँढे ३ करोडको लागतमा आधुनिक प्राविधिक शिक्षालय निर्माण भई पठन पाठन शुरु भएको छ । फ्रान्सेली दातृ निकाय र सोलुदुधकुण्ड नगरपालिकाको लागत साझेदारीमा नुम्बुर प्राविधिक शिक्षालय संचालनमा आएको हो । नगरपालिकाको वडा नम्बर ७ गार्मामा आवासिय सुविधा सहित ३ करोड ४० लाखको लागतमा प्राविधिक शिक्षालय बनाईएको नुम्बुर भोकेसनल ट्रेनिङ सेण्टरका अध्यक्ष निमा शेर्पाले बताउनु भयो ।

नगरपालिकाका युवाहरुलाई स्वरोजगारमुलक सिप सिकाई विदेश पलायनबाट रोक्ने उद्देश्यले निर्माण गरिएका आधुनिक र सुविधा सम्पन्न प्राविधिक शिक्षालयमा निशुल्क रुपमा पढाउन थालिएको नगर प्रमुख नाम्गेलजाङ्बु शेर्पाले बताउनु भयो । पहिलो प्राथमिक्तामा नगरपालिका र बाँकी जिल्ला भरिका विद्यार्थी भर्ना गरिएको मेयर शेर्पाको भनाई छ । सोलु च्याम नामक फ्रान्सेली दातृ निकायले नुम्बुर प्राविधिक शिक्षालय मार्फत भवन निर्माण र संचालनको लागि लगानि गर्नेछ । प्लम्बिङ, कुक र हाउस वाईयरिङ सम्बन्धि ३ विधामा तत्काल १०–१० जनाका दरले ३० जना विद्यार्थीलाई पढाउन शुरु गरिएको प्राविधिक शिक्षालयका अध्यक्ष निमा शेर्पाले जानकारी दिनुभयो ।

सिटिईभिटिबाट सम्बन्धन लिईएको ३ वटै कोर्ष २ बर्षे हुन् । एसईई को परिक्षा दिएका विद्यार्थीहरु आवाशिय रुपमा उक्त कक्षामा सामेल भएका छन् । काठमाण्डौ र विराटनगरबाट दक्ष प्रशिक्षक ल्याईएको उक्त प्राविधिक शिक्षालयमा सबै विद्यार्थीका लागि खाना बस्नको ब्यवस्था मिलाईएको र अबको ६ महिना पछि थप विधामा ३० जना विद्यार्थी भर्ना लिने अध्यक्ष शेर्पाले बताउनुभयो । ब्यवशायीक शिक्षा लिनकै लागि लाखौँ खर्च गरेर काठमाण्डौ पर्ने विवशताका विच यो प्राविधिक शिक्षालय खुलेसँगै राहात मिलेको वडा नम्बर ८ केरुङका अभिभावक भेषबहादुर मगरको भनाई छ । गाउँघरमै ब्यवशायीक शिक्षा आफ्ना छोराछोरीलाई दिन पाउँदा अभिभावकहरुले भने खुशि ब्यक्त गरेका छन् । उक्त भवन पिके कन्ष्ट्रक्सन प्रालिले निर्माण सम्पन्न गरेको हो । अब मैदानको केही काम मात्रै बाँकी रहेको पिके कन्ष्ट्रक्सनका संचालक कान्छा शेर्पाले बताउनु भयो ।