सोलुखुम्बुमा हातिपाइले रोग पहिचान सम्बन्धी अभिमुखिकरण कार्यक्रम सम्पन्न

बैशाख १९, सोलुखुम्बु । सोलुखुम्बुमा हातिपाइले रोगको पहिचान सम्बन्धी दुई दिने अभिमुखिकरण कार्यक्रम सफलतापूर्वक सम्पन्न भएको छ । स्वास्थ्य कार्यालय सोलुखुम्बुको आयोजनामा सम्पन्न उक्त कार्यक्रममा जिल्लाका आठ स्थानीय तहका ११ जना स्वास्थ्यकर्मीहरुको सहभागिता रहेको थियो । कार्यक्रममा काठमाण्डौस्थित विशेषज्ञ टोलीबाट आएका डाक्टर तथा जनस्वास्थ्य विज्ञहरुले हातिपाइले रोगको प्रारम्भिक चिन्हहरू, पहिचान गर्ने तरिका तथा उपचारका उपायहरूबारे व्यापक जानकारी दिइएको स्वास्थ्य कार्यालय सोलुखुम्बुका प्रमुख सुमन तिवारीले जानकारी दिनुभयो ।

तालिममा रोग सर्ने प्रक्रिया, जोखिम घटाउने उपाय, तथा रोग नियन्त्रणका प्रयासहरूबारे विस्तृत प्रशिक्षण प्रदान गरिएको थियो । हातिपाइले रोग क्युलेकस जातको पोथी लामखुट्टेको टोकाइबाट सर्ने गर्दछ। लामो समयसम्म उपचार नहुँदा शरीरका नशाहरू सुन्निने, हातखुट्टा अस्वाभाविक रूपमा मोटो हुने जस्ता गम्भीर लक्षण देखा पर्ने प्रमुख तिवारीको भनाई छ । नेपालका ६३ जिल्लामा हातिपाइले रोगको जोखिम रहेको सरकारले पहिचान गरेपनि सोलुखुम्बु जिल्लामा भने हालसम्म यसको औपचारिक पहिचान नभएको जनाइएको छ ।

रोग नियन्त्रणका लागि सरकारले वर्षमा एकपटकको दरले ६ वर्षसम्म आम औषधि सेवन अभियान संचालन गर्दै आएको छ । स्वास्थ्यकर्मीहरूलाई प्रशिक्षित गरेर समुदायस्तरमै रोग पहिचान र सचेतना फैलाउने उद्देश्यले आयोजना गरिएको तालिमले जिल्लामा हातिपाइले रोगबारे जागरुकता बढाउने अपेक्षा गरिएको छ ।