सोलुखुम्बु प्रवेश गर्ने मुख्य आन्तरिक सिमानाको प्रजिअ घिमिरेद्धारा अनुगमन

बैशाख २०, सोलुखुम्बु । सोलुखुम्बुमा शान्ति सुरक्षा र सीमाना निगरानीलाई थप मजबुत बनाउने उद्देश्यले प्रमुख जिल्ला अधिकारी (प्रजिअ) अनोज कुमार घिमिरेको नेतृत्वमा प्रमुख आन्तरिक सिमानाको निरीक्षण तथा अनुगमन गरिएको छ । प्रजिअ घिमिरेसँगै जिल्ला प्रहरी कार्यालय सोलुखुम्बुका कार्यालय प्रमुख प्रहरी नायब उपरीक्षक (डीएसपी) द्वारिका प्रसाद घिमिरेसहितको टोलीले जिल्लामा प्रवेश गर्ने मुख्य आन्तरिक नाकाहरूको स्थलगत निरीक्षण गरेको हो ।

निरीक्षणको क्रममा सुरक्षाको अवस्था, आवागमन व्यवस्थापन, सीमा निगरानी तथा सम्भावित जोखिमहरूप्रति सतर्कता अपनाउन सम्बन्धित निकायहरूलाई आवश्यक निर्देशनहरू समेत दिइएको जनाइएको छ । निरीक्षणबाट सीमाना क्षेत्रहरूमा सुरक्षा व्यवस्थामा सुधार ल्याउने तथा आपराधिक गतिविधि नियन्त्रण गर्न अनुगमनलाई नियमित बनाइने जानकारी जिल्ला प्रशासन कार्यालयले जनाएको छ । प्रजिअ घिमिरेले सीमाना सुरक्षालाई प्राथमिकतामा राख्दै नागरिकहरूको सुरक्षामा कुनै कसर बाँकी नराख्ने प्रतिबद्धता व्यक्त गर्नुभएको छ ।