सोलुमा पनि जेन जीको आन्दोलन, माग पुरा नभए कडा रूपमा प्रस्तुत हुने चेतावनी

भदौ २४, सोलुखुम्बु । जेनजी पुस्ताले थालेको भ्रष्टाचार र बेथिति विरुद्धको आन्दोलन देशभर चर्किरहेको छ ।  यसैक्रममा हिमाली जिल्ला सोलुखुम्बुमा समेत आन्दोलनले निरन्तरता पाएको छ ।  जिल्लामा उपलब्ध जेन जी पुस्ताहरुले जिल्ला सदरमुकामको जेरोप्वाइन्ट देखी  आवाडाँडा हुँदै आवाडाँडा सम्म र्‍याली गरेका हुन ।  शान्तीपूर्ण र्‍याली गर्दै युवाहरूले सरकारको भ्रष्टाचार र बेथितिको अन्त्यहुनुपर्ने माग राखेका छन् ।

 उनीहरूले प्रधानमन्त्री तथा सांसदहरूको राजीनामाको माग गर्दै अन्तरिम सरकार बनाउनुपर्ने माग राखिरहेका छन् ।  आन्दोलन गर्दै युवाहरुले सोमबार भएको आन्दोलनका क्रममा मारिएका युवा तथा विद्यार्थीहरूको नाममा दीप प्रज्वलन गरि आन्दोलन स्थगित गरेका छन् ।  आज जिल्लामा शान्तिपूर्ण आन्दोलन गरेका युवाहरूले माग पुरा नभए भोलि अझ सशक्त आन्दोलन गर्ने जनाएका छन् ।

 आन्दोलनको व्यवस्थापनमा जिल्ला प्रशासन कार्यालयले प्रहरी परिचालन देखी सुरक्षा व्यवस्थालाई कडा बनाएको जिल्ला प्रशासन कार्यालय सोलुखुम्बुका प्रमुख जिल्ला अधिकारी लिला केसी पाण्डेले बताउनुभयो ।  यस्तै जेन जीले थुलुङ दुधकोसी गाउँपालिकाको वडा नम्बर १ नेलेमा समेत र्‍याली गरेको छ । जिल्ला सदरमुकाम सल्लेरीमा करिव १ सय बढी युवाहरूले र्याली गरेका थिए भने नेलेमा २ सय ५० बढी युवाहरूको सहभागिता रहेको जनाईएको छ ।