सोलुखुम्बुका १४० विपन्न तथा जेहेन्दार विद्यार्थीले पाए छात्रवृत्ति

असोज २२, सोलुखुम्बु । शेर्पा बालबालिका सहायता संघको पहल तथा लोरेन्स नेपाल फ्रान्स र राइलेन्ड लोरेन नेपाल जर्मनीको आर्थिक सहयोगमा सोलुखुम्बुका १४० जना विद्यार्थीलाई छात्रवृत्ति वितरण गरिएको छ। संघका कार्यक्रम संयोजक सन्तबहादुर बुढाथोकी मगर (र्‍याबिट) का अनुसार छात्रवृत्ति वितरण कार्यक्रमको तेस्रो दिनसम्म सोलुदुधकुण्ड नगरपालिका–३ लोदिङ तामाखानीस्थित पिके माध्यमिक विद्यालय, वडा नं. २ चारघरेस्थित सेतीदेवी आधारभूत विद्यालय, वडा नं. २ सालाबेशीस्थित बेनी आधारभूत विद्यालय र बुद्ध एकेडेमी आधारभूत विद्यालयका विद्यार्थीलाई छात्रवृत्ति प्रदान गरिएको हो।

आर्थिक अभावका कारण शिक्षाबाट वञ्चित हुन सक्ने विपन्न तथा जेहेन्दार विद्यार्थीलाई लक्षित गरी जिल्लाका सामुदायिक विद्यालयमा अध्ययनरत करिब ५८० विद्यार्थीलाई छात्रवृत्ति प्रदान गरिने संघले जनाएको छ। जिल्लाका २२ वटा सामुदायिक विद्यालयका विद्यार्थीलाई छात्रवृत्ति उपलब्ध गराउने कार्यक्रम रहेको छ। असोज २० गतेदेखि सुरु भएको छात्रवृत्ति वितरण कार्यक्रम असोज २९ गतेसम्म सञ्चालन हुने जनाइएको छ।

कार्यक्रमअन्तर्गत सोलुदुधकुण्ड नगरपालिका, माप्य दूधकोशी गाउँपालिका र थुलुङ दूधकोशी गाउँपालिकाका सामुदायिक विद्यालयमा अध्ययनरत विद्यार्थीलाई छात्रवृत्ति प्रदान गरिनेछ। कार्यक्रम संयोजक बुढाथोकीका अनुसार छात्रवृत्ति पाउने विद्यार्थी आर्थिक रूपमा विपन्न तथा अध्ययनमा जेहेन्दार रहेका छन्। आर्थिक अभावकै कारण बालबालिकाको पढाइ प्रभावित नहोस् भन्ने उद्देश्यले छात्रवृत्ति कार्यक्रम सञ्चालन गरिएको हो।

छात्रवृत्ति वितरणसँगै संघले आगामी वर्षका लागि समेत विद्यार्थीको आवेदन संकलन गरिरहेको जनाएको छ। यसबाट हाल अध्ययनरत विद्यार्थीलाई सहयोग पुग्नुका साथै आगामी वर्ष छात्रवृत्ति पाउन सक्ने विद्यार्थीको पहिचान गर्नसमेत सहज हुने संघको भनाइ छ। छात्रवृत्ति वितरणको काम अझै जारी रहेकाले तोकिएका अन्य विद्यालयका विद्यार्थीलाई पनि क्रमशः सहयोग उपलब्ध गराइनेछ। आर्थिक अभावका कारण शिक्षामा आउने अवरोध न्यूनीकरण गर्दै बालबालिकालाई नियमित विद्यालय जाने वातावरण बनाउन छात्रवृत्ति कार्यक्रमले सहयोग पुग्ने अपेक्षा गरिएको छ।