दशैँमा फेरि घुम्दैछ आरुबोटको रोटे पिङ

किशान बहादुर मगर, असोज २२ । दशैँ नजिकिएसँगै गाउँघरमा चहलपहल बढ्न थालेको छ। नयाँ लुगा, मीठो परिकार र आफन्तसँगको भेटघाटसँगै गाउँघरमा परम्परागत पिङको रौनक पनि फर्किन थालेको छ। ओखलढुंगाको मानेभञ्ज्याङ गाउँपालिका–६, आरुबोटमा भने यस वर्ष पनि परम्परागत रोटे पिङ सञ्चालन गर्ने तयारी गरिएको छ।

करिब एक दशक रोकिएको रोटे पिङ स्थानीय युवाको पहलमा २०८० सालमा पुनः सञ्चालनमा ल्याइएको थियो। त्यसयता दशैँको अवसरमा निरन्तर सञ्चालन हुँदै आएको रोटे पिङलाई यस वर्ष पनि निरन्तरता दिन लागिएको हो। रोटे पिङ निर्माणका लागि आवश्यक अधिकांश सामग्री अघिल्ला वर्षकै प्रयोग गरिने भएको छ। यस वर्ष भने पिङको मुख्य खाबो नयाँ फेर्ने तयारी गरिएको स्थानीय नारायण पुलामी मगरले बताउनुभयो।

उहाँका अनुसार नयाँ खाबो तयार गर्ने कामसमेत पूरा भइसकेको छ। अब पुराना सामग्रीको आवश्यक मर्मत, परीक्षण र जडान गरी पिङ सञ्चालनमा ल्याउने तयारी भइरहेको उहाँले बताउनुभयो। स्थानीय युवाको सक्रियतामा हरेक वर्ष दशैँको समयमा सञ्चालन हुँदै आएको रोटे पिङले गाउँको पुरानो परम्परा र सांस्कृतिक पहिचानलाई निरन्तरता दिन सहयोग पुगेको स्थानीयको भनाइ छ। दशैँ मनाउन गाउँ फर्किने स्थानीयसँगै आसपासका क्षेत्रबाट आउने सर्वसाधारणका लागि पनि आरुबोटको रोटे पिङ आकर्षणको केन्द्र बन्ने अपेक्षा गरिएको छ।

आधुनिक मनोरञ्जनका साधनको प्रयोग बढ्दै गए पनि गाउँघरमा पुस्तौँदेखि चलिआएको रोटे पिङले भने दशैँको मौलिक रौनक र पुराना सम्झनालाई अझै जीवित राखेको छ। स्थानीय युवाको सक्रियता र समुदायको सहकार्यमा सञ्चालन हुँदै आएको रोटे पिङले नयाँ पुस्तालाई समेत स्थानीय संस्कृति र परम्परासँग जोड्ने माध्यम बन्ने विश्वास गरिएको छ।