खोटाङमा प्रतिनिधिसभा निर्वाचनमा १५ उम्मेदवार मैदानमा, महिला उम्मेदवारी शून्य

अशोक साम्पाङ, खोटाङ ।  फागुन २१ गते तोकिएको प्रतिनिधिसभा सदस्य निर्वाचनका लागि खोटाङ जिल्लामा उम्मेदवारी दर्ता प्रक्रिया सम्पन्न भएसँगै राजनीतिक सरगर्मी तीव्र बनेको छ । एकमात्र प्रतिनिधिसभा निर्वाचन क्षेत्र रहेको खोटाङमा १३ वटा राजनीतिक दल र दुई स्वतन्त्र गरी कुल १५ जनाले उम्मेदवारी दर्ता गराएका छन् । मुख्य निर्वाचन अधिकृत फणिन्द्रप्रसाद पराजुलीका अनुसार जिल्लामा स्थापित ठूला दलदेखि नयाँ र वैकल्पिक शक्तिसम्म निर्वाचन मैदानमा उत्रिएका छन् । यसले खोटाङको राजनीतिक प्रतिस्पर्धा बहुआयामिक र रोचक बन्ने संकेत गरेको छ । सत्तारूढ नेपाली कांग्रेसबाट वीरकाजी राई उम्मेदवार बनेका छन् भने प्रमुख प्रतिपक्ष नेकपा एमालेबाट देवविक्रम राईले मनोनयन दर्ता गराएका छन् । यस्तै, नेपाली कम्युनिस्ट पार्टी (नेकपा)बाट हरि रोका, नेकपा (माओवादी केन्द्र)बाट चन्द्रबहादुर बुढाथोकी उम्मेदवार बनेका छन् ।

        नयाँ र वैकल्पिक राजनीतिक धारका दलहरू पनि यस निर्वाचनमा सक्रिय देखिएका छन् । श्रम संस्कृति पार्टीबाट आरेन राई, राष्ट्रिय स्वतन्त्र पार्टी (रास्वपा)बाट रुद्र गिरी, उज्यालो नेपाल पार्टीसँग सहकार्य गरेको राष्ट्रिय परिवर्तन पार्टीबाट मिरेश राईले उम्मेदवारी दर्ता गराएका छन् । यी दलहरूले परम्परागत राजनीतिभन्दा फरक एजेन्डा अघि सारेका कारण युवापुस्ताको ध्यान तान्ने प्रयास गरिरहेका छन् ।

   यस्तै, जनता समाजवादी पार्टी (जसपा)बाट राकेश राई, जसपा नेपालबाट सुनिल चाम्लिङ, राष्ट्रिय प्रजातन्त्र पार्टी (राप्रपा)बाट दीपक तामाङ, मंगोल नेशनल अर्गनाइजेसनबाट प्रयाग राई, नेपाल मजदुर किसान पार्टी (नेमकिपा)बाट ध्यानप्रसाद ढकाल र मितेरी पार्टी नेपालबाट केशरमान चाम्लिङ उम्मेदवार बनेका छन् । यसैगरी, डा. राजकुमार राई र तिलकचन्द्र राईले स्वतन्त्र उम्मेदवारी दर्ता गराएका छन् । स्वतन्त्र उम्मेदवारहरूको उपस्थितिले मतदातालाई दलभन्दा व्यक्तित्व र एजेन्डामा आधारित विकल्प दिने अपेक्षा गरिएको छ । तर, यस पटकको उम्मेदवारी दर्तामा एउटा गम्भीर पक्ष पनि देखिएको छ । जिल्लामा उम्मेदवारी दिएका १३ वटै राजनीतिक दलबाट एक जना पनि महिला उम्मेदवार नउठाइनु समावेशी लोकतन्त्रको मर्मविपरीत देखिएको छ । संविधान र कानुनले समावेशीतालाई जोड दिए पनि व्यवहारमा दलहरू अझै अनुदार देखिएको राजनीतिक विश्लेषकहरूको टिप्पणी छ । मतदाता तथ्यांक अनुसार खोटाङ जिल्लामा १० स्थानीय तहमा फैलिएका १ लाख ४७ हजार १ सय २० जना मतदाता छन् । निर्वाचनका लागि जिल्लाभर १३६ मतदान स्थल र १९५ मतदान केन्द्र तोकिएका छन् । निर्वाचन आयोगले स्वच्छ, निष्पक्ष र भयरहित वातावरणमा मतदान सम्पन्न गराउने तयारी तीव्र पारेको जनाएको छ । उम्मेदवारी दर्तासँगै अब चुनावी प्रचार–प्रसार, एजेन्डा र जनसम्पर्कको चरण सुरु हुने भएकाले खोटाङको राजनीतिक माहोल आगामी दिनमा अझ तातेको देखिनेछ । परम्परागत र नयाँ राजनीतिक शक्तिबीचको प्रतिस्पर्धाले मतदाताले कस्तो जनादेश दिन्छन् भन्ने चासो बढ्दै गएको छ ।