भाेट हाल्न अव ८ दिन बाँकी, सोलुमा आचारसंहिताका छिटपुट गुनासा बाहेक अवस्था सामान्य

फागुन १३, सोलुखुम्बु । निर्वाचन नजिकिँदै गर्दा हिमाली जिल्ला सोलुखुम्बुको चुनावी रौनकता दिनानुदिन बढ्दै गएको छ । उम्मेदवारहरूले आफ्ना एजेण्डा र भिजन सुनाएर नागरिकको मत आफ्नो पक्षमा पार्नका लागी करिव एक हप्ता बाँकी रहँदा निर्वाचन केन्द्रित भएका उम्मेदवारहरूलाई भ्याइनभ्याई छ ।  जिल्लामा १२ वटा राजनैतिक दलका १२ उम्मेद्वार चुनावी मैदानमा छन् ।  कठिन भूगोलका बाबजुद पनि उम्मेदवारहरू नागरिकका घरदैलोमा पुग्न आफ्ना बुताले भ्याएसम्म  कोशिश गरिरहेका छन् ।

सबैभन्दा टाढा रहेको खुम्बु पासाङ ल्हामु गाउँपालिका समेत उम्मेद्वारहरु पुग्न भ्याइसकेका छन् । जिल्लाका अन्य स्थानीयतहहरुमा समेत आफ्नो महौल बनाउनका लागी उम्मेदवारहरू पुगिरहेको अवस्था भएको बताइएको छ । यता जिल्लामा निर्वाचन स्वच्छ मर्यादित र भयरहित बनाउन प्रशासन र सम्बन्धित निकाय लागी परिरहेको जिल्ला प्रशासन कार्यालय सोलुखुम्बुका सूचना अधिकारी एवं सहायक प्रमुख जिल्ला अधिकारी देवेन्द्र सुवेदीले बताउनुभयो ।  

निर्वाचन आचार संहिता अनुगमन अधिकृत समेत रहनुभएका सुवेदीले हाल सम्म जिल्लामा आचारसंहिता उल्लङ्घनका लिखित उजुरीहरू नपरेको जानकारी दिनुभएको छ । यद्यपि मौखिक उजुरीहरू आएका छन् ।  विशेष गरि भेला तथा सभामा तोकिएभन्दा बढी भिड जम्मा गरेका, सवारी साधनको प्रयोगमा मनोमानी गरिएका, स्टिकर टाँस्ने तथा पर्चा बाँड्ने कार्यहरू नरोकिएका लगायतका जानकारीहरू प्राप्त भएको उहाँको भनाई छ । प्राप्त गुनासोहरुलाई सुनुवाई गर्ने र सचेत गराउने कार्यमा कुनै कसर बाँकी नराखिएको सुवेदीको दावी छ ।