सबिना राई, असार २१, सोलुखुम्बु । सोलुखुम्बु जिल्लालाई पूर्ण खोप सुनिश्चितता तथा दिगोपना जिल्ला घोषणा गरिएको छ । खोप उमेर समूहका सबै बालबालिकाले राष्ट्रिय खोप कार्यक्रमअन्तर्गत तोकिएका सबै खोपको मात्रा पूरा गरेको सुनिश्चित भएपछि आइतबार आयोजित एक कार्यक्रममार्फत जिल्लालाई पूर्ण खोप सुनिश्चितता तथा दिगोपना जिल्ला घोषणा गरिएको हो ।
नेपाल सरकारले निःशुल्क उपलब्ध गराउँदै आएको १३ प्रकारका खोप १५ महिनामुनिका सबै बालबालिकाले प्राप्त गरेको जिल्ला स्वास्थ्य कार्यालयको प्रतिवेदनमा उल्लेख गरिएको छ । जिल्ला स्वास्थ्य कार्यालय सोलुखुम्बुका प्रमुख जीवनप्रसाद चौलागाईंका अनुसार जिल्लाभर गरिएको सर्वेक्षणमा कुल ५ हजार ६ सय ३७ जना लक्षित बालबालिका समेटिएका थिए ।
तीमध्ये ० देखि ११ महिनाका ९ सय २ जना र १६ देखि २३ महिनाका ६ सय ४ जना बालबालिका रहेका थिए। सर्वेक्षणका क्रममा जिल्लाभरका ५ हजार ६ सय ३७ जना बालबालिकामध्ये अधिकांशले पहिले नै पूर्ण खोप प्राप्त गरिसकेका थिए । विभिन्न स्थानीय तहमा आंशिक रूपमा खोप छुटेका तीन जना बालबालिका मात्र फेला परेका थिए । ती बालबालिकालाई स्वास्थ्यकर्मी तथा खोप सुनिश्चितता समन्वय समितिको पहलमा तत्काल खोप सेवाको पहुँचमा ल्याई आवश्यक सबै मात्रा प्रदान गरी पूर्ण खोप सुनिश्चित गरिएको कार्यालयले जनाएको छ । पूर्ण खोप सुनिश्चितता प्रक्रियाअन्तर्गत १६ देखि ५९ महिनासम्मका बालबालिकाको खोप अवस्थाको पहिचान गरिन्छ ।
खोप छुटेका बालबालिकालाई आवश्यक सबै मात्रा प्रदान गरेपछि मात्र पूर्ण खोप सुनिश्चितता घोषणा गरिने व्यवस्था रहेको छ । कार्यक्रममा आगामी वर्षहरूमा पनि कुनै पनि बालबालिका खोपबाट वञ्चित नहुने गरी सबैलाई पूर्ण खोप उपलब्ध गराउने प्रतिबद्धतासहित सरोकारवालाहरूले हस्ताक्षरसमेत गरेका छन् । घोषणा समारोहमा जिल्लाका आठ वटै स्थानीय तहलाई सम्मान गरेको थियो ।
जिल्ला समन्वय समिति सोलुखुम्बुका प्रमुख कृष्णप्रसाद निरौलाको अध्यक्षतामा सम्पन्न कार्यक्रममा आठवटै स्थानीय तहका स्वास्थ्य संयोजकलाई प्रमाणपत्र र दोसल्ला ओडाएर सम्मान गरिएको थियो । कार्यक्रममा जिल्लाका राजनीतिक दलका प्रतिनिधि, स्थानीय तहका स्वास्थ्य शाखाका प्रतिनिधि, सुरक्षाकर्मी तथा विभिन्न सरोकारवाला निकायका प्रतिनिधिहरूको उल्लेखनीय सहभागिता रहेको थियो ।
Discussion about this post