साउन ७, सोलुखुम्बु । नेपाली कांग्रेसका केन्द्रीय सदस्य आङ गेलु शेर्पाले नेपाली कांग्रेस कमजोर भए मुलुकको लोकतान्त्रिक व्यवस्थामाथि नै संकट उत्पन्न हुन सक्ने बताएका छन् । ४४औँ बीपी स्मृति दिवस तथा ‘जरा अभियान’ समापन एवं अन्तरक्रिया कार्यक्रममा बोल्दै उनले पार्टीभित्रका सबै प्रकारका तिक्तता, गुटगत विवाद र व्यक्तिगत असन्तुष्टि अन्त्य गर्दै कांग्रेस एक ढिक्का हुनुपर्नेमा जोड दिए ।
उनले बीपी कोइरालाले स्थापित गरेको लोकतान्त्रिक मूल्य, राष्ट्रिय एकता र समाजवादको मार्गलाई वर्तमान राजनीतिक परिवेशमा अझ सशक्त रूपमा अघि बढाउन कांग्रेसभित्रको एकता अपरिहार्य रहेको बताए। कार्यक्रममा संविधानसभा सदस्य तथा कांग्रेस नेता रामहरि खतिवडाले बीपीको राजनीतिक दर्शन आज पनि मुलुकका लागि उत्तिकै सान्दर्भिक रहेको उल्लेख गर्दै लोकतान्त्रिक शक्तिहरूबीच सहकार्य र कांग्रेसभित्र आन्तरिक सुदृढीकरण आवश्यक रहेको धारणा राखे। कार्यक्रमको विशेषता भने विभिन्न राजनीतिक दलका नेताहरूको एउटै मञ्चमा उपस्थिति रहनु थियो।
कार्यक्रममा नेकपा (एमाले) का जिल्ला संयोजक हर्कबोल राई, नेकपाका जिल्ला अध्यक्ष तथा राष्ट्रिय स्वतन्त्र पार्टीका जिल्ला उपाध्यक्षको समेत सहभागिता रहेको थियो। यसलाई स्थानीय राजनीतिक वृत्तमा अन्तरदलीय संवाद र सहकार्यको सकारात्मक संकेतका रूपमा हेरिएको छ ।
नेपाली ट्रेड युनियन कांग्रेसका पूर्व केन्द्रीय अध्यक्ष खुला दाहालसहित कांग्रेसका जिल्ला नेता तथा कार्यकर्ताको उल्लेख्य उपस्थिति रहेको कार्यक्रममा बीपी कोइरालाको विचार, लोकतन्त्रको संरक्षण तथा संगठन सुदृढीकरणका विषयमा अन्तरक्रिया गरिएको थियो। नेपाली कांग्रेस ओखलढुंगा जिल्ला सभापति तेजेन्द्र खनालको सभापतित्वमा सम्पन्न कार्यक्रममा बीपी स्मृति दिवसको अवसरमा सञ्चालन गरिएको ‘जरा अभियान’को औपचारिक समापनसमेत गरिएको थियो।
कार्यक्रमका वक्ताहरूले कांग्रेसभित्रको एकता नै लोकतन्त्रको भविष्य सुरक्षित गर्ने आधार भएकाले अब पार्टी संगठनलाई जनतामाझ अझ सशक्त रूपमा स्थापित गर्नुपर्नेमा जोड दिएका थिए।
Discussion about this post