४४औँ बीपी स्मृति दिवसको अवसरमा थुलुङ दूधकोशी सामुदायिक अस्पतालमा बिरामीलाई फलफूल वितरण

साउन ७, सोलुखुम्बु । ४४औँ बीपी स्मृति दिवसको अवसरमा नेपाली कांग्रेसका केन्द्रीय महाधिवेशन प्रतिनिधि जीवन गुरुङ तथा कांग्रेसका युवा नेता अश्विन बाबु थापाले थुलुङ दूधकोशी सामुदायिक अस्पतालमा उपचाररत बिरामीहरूलाई फलफूल वितरण गर्दै दिवस मनाएका छन्। बीपी कोइरालाले स्थापित गरेको लोकतान्त्रिक मूल्य–मान्यता, मानव सेवा र सामाजिक उत्तरदायित्वको भावनालाई आत्मसात् गर्दै अस्पतालमा रहेका बिरामीहरूलाई फलफूल वितरण गरिएको आयोजकले जनाएको छ।

कार्यक्रममा अस्पतालमा उपचाररत बिरामीहरूको शीघ्र स्वास्थ्यलाभको कामना गर्दै उनीहरूलाई फलफूल हस्तान्तरण गरिएको थियो। नेताद्वयले बीपी कोइरालाले देखाएको सेवा, त्याग र जनमुखी राजनीतिको मार्ग आज पनि उत्तिकै सान्दर्भिक रहेको उल्लेख गर्दै समाजप्रति उत्तरदायी कार्यमार्फत बीपीको योगदानलाई स्मरण गर्नु सबैको दायित्व भएको बताउनु भयो ।

उक्त अवसरमा अस्पतालका स्वास्थ्यकर्मी, स्थानीय कांग्रेसका नेता–कार्यकर्ता तथा अन्य उपस्थित व्यक्तिहरूको समेत सहभागिता रहेको थियो।हरेक वर्ष साउन ६ गते मनाइने बीपी स्मृति दिवसका अवसरमा देशभर विभिन्न सामाजिक, रचनात्मक तथा स्मरणात्मक कार्यक्रम आयोजना गरिँदै आएको छ।