सोताङ गाउँपालिका–४ ले काठमाडौँमा सेवा शिविर सञ्चालन गर्ने

साउन ८, सोलखुुम्बु । सोलुखुम्बुको सोताङ गाउँपालिका–४ ले काठमाडौं उपत्यकामा अस्थायी रूपमा बसोबास गरिरहेका वडावासीलाई लक्षित गर्दै प्रशासनिक तथा व्यक्तिगत घटना दर्ता सम्बन्धी सेवा उपलब्ध गराउने उद्देश्यले काठमाडौंमा सेवा शिविर सञ्चालन गर्ने भएको छ । वडा सचिव जनक अधिकारीका अनुसार स्थायी घर सोताङ गाउँपालिका–४ भए पनि रोजगारी, व्यवसाय, अध्ययन तथा अन्य कारणले काठमाडौंमा बसोबास गरिरहेका नागरिकलाई गाउँमा पुगेर सेवा लिनुपर्ने बाध्यता कम गर्न शिविर आयोजना गर्न लागिएको हो ।

शिविरमार्फत घटना दर्ता, पञ्जीकरणलगायत वडाबाट प्रवाह हुने विभिन्न प्रशासनिक सेवा प्रदान गरिने जनाइएको छ । शिविर साउन १८ र १९ गते बिहान ८ः०० बजेदेखि दिउँसो ५ः०० बजेसम्म काठमाडौंको ए वान पार्टी प्यालेस, चाबहिल मा सञ्चालन हुनेछ । सेवा लिन आउने सेवाग्राहीलाई आवश्यक कागजातसहित उपस्थित हुन वडा कार्यालयले आग्रह गरेको छ ।

वडा कार्यालयका अनुसार यस कार्यक्रमको मुख्य उद्देश्य काठमाडौंमा रहेका वडावासीलाई सहज, छिटो र पहुँचयुक्त सेवा उपलब्ध गराउनुका साथै गाउँसम्म आवतजावत गर्दा लाग्ने समय र खर्च बचत गर्नु हो । यसबाट नागरिकमैत्री सेवा प्रवाहलाई प्रभावकारी बनाउने वडा कार्यालयले विश्वास व्यक्त गरेको छ ।