‘जेन्जी’ भन्ने शब्द र प्रवृत्ति नै मन पर्दैन : अध्यक्ष कुलुङ

साउन १०, सोलुखुम्बु । सोलुखुम्बुको महाकुलुङ गाउँपालिकाका अध्यक्ष सूर्य बहादुर कुलुङले पछिल्लो समय चर्चामा रहेको ‘जेन्जी’ पुस्ताको प्रवृत्तिप्रति असन्तुष्टि जनाउनुभएको छ । उहाँले ‘जेन्जी’ भन्ने शब्द र त्यससँग जोडिएको कार्यशैलीप्रति नै आफ्नो असहमति रहेको बताउनुभएको हो । हिमचुली आधारभूत विद्यालयको अक्षयकोष स्थापना तथा समुद्घाटन कार्यक्रममा सम्बोधन गर्दै अध्यक्ष कुलुङले नयाँ पुस्ताको काम गर्ने शैली र प्रभावबारे प्रश्न उठाउनुभएको हो ।

अध्यक्ष कुलुङले ‘जेन्जी’ पुस्ताको नाममा विभिन्न योजना र विषयमा भ्रमपूर्ण धारणा फैलाउने काम भइरहेको दाबी गर्नुभयो । प्रहरी भवन निर्माणलगायतका विषयमा आएका कतिपय कुराहरू वास्तविकताभन्दा फरक रहेको उल्लेख गर्दै उहाँले स्थानीय तहमा यस्ता भ्रमपूर्ण कुरा लागू हुन नसक्ने स्पष्ट पार्नुभयो । उहाँले संघीय सरकारले शिक्षक तथा स्वास्थ्यकर्मीको दरबन्दी वा अनुदान कटौती गर्ने नीति ल्याएको भन्दै आलोचना गर्नुभयो ।

शिक्षा र स्वास्थ्यजस्ता संवेदनशील क्षेत्रमा जनशक्ति अभाव रहेको अवस्थामा कटौतीभन्दा लगानी बढाउनुपर्ने उहाँको भनाइ थियो । महाकुलुङ गाउँपालिकाले शिक्षा र स्वास्थ्य क्षेत्रलाई प्राथमिकतामा राखेर बजेट विनियोजन गर्दै आएको उहाँले जानकारी दिनुभयो । उहाँका अनुसार पालिकाले स्वास्थ्य क्षेत्रमा करिब ३ करोड १३ लाख रुपैयाँ र शिक्षा क्षेत्रमा ६ देखि ७ करोड रुपैयाँभन्दा बढी लगानी गरिसकेको छ ।

शिक्षामा गरिएको लगानीका कारण गाउँपालिकाको शैक्षिक अवस्थामा सुधार आएको दाबी गर्दै अध्यक्ष कुलुङले महाकुलुङबाट एसएलसी÷एसईई परीक्षामा सहभागी सबै विद्यार्थी उत्तीर्ण भएको बताउनुभयो । देशको आर्थिक अवस्थाप्रति टिप्पणी गर्दै उहाँले बजेट कटौती र समयमा रकम निकासा नहुँदा स्थानीय तह प्रभावित भएको बताउनुभयो । अध्यक्ष कुलुङले वर्तमान आर्थिक व्यवस्थापनप्रति असन्तुष्टि जनाउँदै सरकारले स्थानीय तहलाई आवश्यक स्रोत उपलब्ध गराउनुपर्नेमा जोड दिनुभयो ।