नेचा तुइनटारमा फल्यो काजु, काजु देखी स्याउ फल्ने भूगोलमा नयाँ सम्भावनाको वीज 

साउन १२, सोलुखुम्बु । हिमाली जिल्ला सोलुखुम्बुमा पनि काजु उत्पादन हुन थालेपछि कृषि क्षेत्रमा नयाँ सम्भावनाको ढोका खुलेको छ । जिल्लाको नेचासल्यान गाउँपालिका–४ स्थित तुइनटारका एक कृषकले आफ्नो बारीमा रोपेका काजुका बिरुवामा फल लाग्न थालेपछि यस क्षेत्रको कृषि विविधीकरण र व्यावसायिक खेतीतर्फ सकारात्मक सन्देश गएको हो ।  तुइनटार क्षेत्र सोलुखोला र दूधकोशी नदीको संगम नजिक रहेको अपेक्षाकृत तातो हावापानी भएको भूभाग हो ।

यही भौगोलिक विशेषताका कारण यहाँ काजुजस्तो उष्ण हावापानीमा उत्पादन हुने बाली समेत सफलतापूर्वक फल्न थालेको स्थानीयले बताएका छन् । स्थानीय चन्द्र कुमार राईको घुर्यानमा रोपिएको काजु विगत केही वर्षदेखि निरन्तर उत्पादन हुँदै आएको छ ।  व्यवसायीका रुपमा उत्पादन गर्ने गरि काजु लगाइएको नभएतापानी पाइलट प्रोजेक्ट अर्थात सम्भावना मूल्याङ्कनका लागी लगाएको एक बोटले सकारात्मक प्रभाव देखाएको छ ।  नेचासल्यान गाउँपालिका भित्र भौगोलिक तथा जलवायु विविधताका कारण फरक फरक बाली उत्पादन हुने गरेको छ ।

गाउँपालिकाको उच्च भेगमा स्याउ समेत उत्पादन हुने गरेको छ भने मध्य तथा तल्लो भेगमा मरीच र काजुजस्ता नगदे बालीको सम्भावना देखिएको छ । यसले एउटै स्थानीय तहभित्र विभिन्न प्रकारका कृषि उत्पादन गर्न सकिने सम्भावना उजागर गरेको छ । स्थानीय कृषकको बारीमा काजु फल्न थालेपछी अन्य कृषक पनि यसतर्फ आकर्षित हुन सक्ने अपेक्षा गरिएको छ। उपयुक्त प्राविधिक सहयोग, बजार व्यवस्थापन र प्रोत्साहन कार्यक्रम सञ्चालन गर्न सके तुइनटार क्षेत्रलाई काजु उत्पादनको सम्भावनायुक्त क्षेत्रका रूपमा विकास गर्न सकिने स्थानीयको विश्वास छ ।

कृषि विज्ञहरूका अनुसार जलवायु अनुकूल रहेका स्थानमा परम्परागत बालीसँगै उच्च मूल्यका नगदे बालीको विस्तार गर्न सकिए किसानको आम्दानी वृद्धि हुनुका साथै स्थानीय अर्थतन्त्रमा समेत सकारात्मक प्रभाव पर्नेछ। तुइनटारमा काजु उत्पादनको सफल सुरुवातले सोलुखुम्बुमा आधुनिक तथा विविधीकृत कृषिको नयाँ आयाम थप्ने अपेक्षा गरिएको छ ।