जिल्ला आयुर्वेद स्वास्थ्य केन्द्र खोटाङबाट १८ हजार ६ सय ६५ सेवाग्राही लाभान्वित

साउन १६, सोलुखुम्बु । जिल्ला आयुर्वेद स्वास्थ्य केन्द्र खोटाङबाट हालसम्म १८ हजार ६ सय ६५ जना सेवाग्राहीले विभिन्न आयुर्वेद स्वास्थ्य सेवा लिएका छन् । केन्द्रका प्रमुख डा. सरविन्द्र प्रसाद यादवका अनुसार कुल सेवाग्राहीमध्ये ४ हजार ८ सय ५२ जनाले ओपिडी सेवाबाट उपचार तथा स्वास्थ्य परामर्श लिएका छन् ।

केन्द्रले सर्वसाधारणलाई लक्षित गर्दै ओपिडी सेवा, निःशुल्क औषधि वितरण, क्षारसूत्र सेवा, स्वास्थ्यवृत्त परामर्श, पञ्चकर्म तथा पूर्वकर्म सेवा, अकुपञ्चर तथा अकुप्रेसर सेवा नियमित रूपमा सञ्चालन गरिरहेको डा. यादवले जानकारी दिनुभयो । त्यसैगरी केन्द्रमा दैनिक योग कक्षा सञ्चालन हुनुका साथै ज्येष्ठ नागरिक स्वास्थ्य कार्यक्रम, स्तनपायी आमा कार्यक्रम तथा विद्यालय आयुर्वेद कार्यक्रममार्फत समुदायस्तरमा आयुर्वेद स्वास्थ्य सेवाको पहुँच विस्तार गरिएको उहाँले बताउनुभयो ।

आयुर्वेद उपचारप्रति नागरिकको आकर्षण बढ्दै गएको उल्लेख गर्दै डा. यादवले रोगको उपचारसँगै स्वस्थ जीवनशैली अपनाउन, योग तथा आयुर्वेदिक पद्धतिलाई दैनिक जीवनमा समावेश गर्न केन्द्रले जनचेतनामूलक कार्यक्रमसमेत सञ्चालन गरिरहेको जानकारी दिनुभयो ।