दुर्गम सडकले सोलुका घुमन्ते व्यापारीको यात्रा कष्टकर

भदौ ६, सोलुखुम्बु । सोलुखुम्बुमा उत्पादन भएका कृषि उपज बिक्रीका लागि विभिन्न बजारमा पुग्ने घुमन्ते व्यापारीलाई सडकको दुरवस्थाले समस्या हुने गरेको छ । वर्षायाममा सडक हिलाम्मे हुने, खाल्डाखुल्डी नदेखिने र सवारीसाधन फस्ने समस्याका कारण कृषि उपज ओसारपसारमा जोखिम बढेको व्यापारीहरूले बताएका छन् । नेचासल्यान गाउँपालिकाका व्यापारी विश्वास राईले सल्लेरी र पत्ताले लगायतका बजारमा आफ्नै फार्ममा उत्पादन गरेका तरकारी बिक्री गर्दै आउनुभएको छ ।

उहाँका अनुसार वर्षा हुनेबित्तिकै सडकको अवस्था बिग्रने भएकाले तरकारी बोकेर बजारसम्म पुग्न कठिन हुने गरेको छ । राईले करिब दुई वर्षदेखि कृषि उपजको व्यापार गर्दै आउनुभएको हो । विदेशबाट फर्किएपछि आफ्नै ठाउँमा फार्म सञ्चालन गरी कृषि उत्पादन र व्यापारमा लाग्नुभएका उहाँले आफ्नै उत्पादनलाई विभिन्न बजारमा लगेर बिक्री गर्ने गर्नुभएको छ । उहाँका अनुसार आफूले उत्पादन गर्ने अधिकांश तरकारी अर्गानिक हुने गरेको छ ।

स्थानीय उत्पादनले वर्षभरि माग धान्न नसक्ने भएकाले प्याजजस्ता केही कृषि उपज भने बाहिरबाट ल्याउनुपर्ने अवस्था रहेको उहाँले बताउनुभयो । अर्गानिक उत्पादनको माग भए पनि बाहिरबाट सस्तोमा आउने कृषि उपजसँग प्रतिस्पर्धा गर्न कठिन हुने राईको भनाइ छ । विशेषगरी होटल व्यवसायीले सस्तो मूल्यमा तरकारी खोज्ने भएकाले स्थानीय अर्गानिक उत्पादनले बजारमा प्रतिस्पर्धा गर्न समस्या हुने उहाँले बताउनुभयो । स्थानीय उत्पादनलाई प्राथमिकता दिइएमा किसान तथा व्यापारीलाई फाइदा पुग्ने उहाँको भनाइ छ । सिजनमा स्थानीय उत्पादन पर्याप्त हुने समयमा बाहिरबाट आउने कृषि उपजमा केही नियन्त्रण गर्न सके किसानले उचित मूल्य पाउने उहाँले बताउनुभयो ।

स्थानीय तहबाट बिउ तथा अन्य कृषि सामग्री सहयोग पाउने गरे पनि गुणस्तरका कारण आफूहरूले एग्रोभेटमार्फत बिउ खरिद गर्ने गरेको राईले बताउनुभयो । पालिकाबाट उपलब्ध हुने बिउको गुणस्तर अपेक्षाअनुसार नहुने भएकाले आफूहरूले आवश्यक बिउ आफैँ खरिद गर्ने गरेको उहाँको भनाइ छ ।

आफ्नो व्यवसायबाट सन्तुष्ट भए पनि स्थानीय बजार सीमित हुनु र बाहिरबाट सस्तोमा कृषि उपज भित्रिनु चुनौती रहेको राईले बताउनुभयो । सडकको अवस्था सुधार भए कृषि उत्पादन बजारसम्म पु¥याउन सहज हुनुका साथै स्थानीय किसान र घुमन्ते व्यापारीको व्यवसायमा समेत सुधार आउने उहाँको अपेक्षा छ ।