सोलुखुम्बुमा आत्महत्या रोकथाममा चुनौतीः पुरुषको संख्या उच्च

भदौ ७, सोलुखुम्बु । हिमाली जिल्ला सोलुखुम्बुमा आत्महत्या गर्ने महिलाको तुलनामा पुरुषको संख्या दोब्बरभन्दा बढी रहेको पाइएको छ । जिल्ला प्रहरी कार्यालय सोलुखुम्बुको तथ्याङ्कअनुसार आर्थिक वर्ष २०८२/८३ मा जिल्लामा ६१ जनाले आत्महत्या गरेका छन् । आत्महत्या गर्नेमा ४३ जना पुरुष र १८ जना महिला रहेका छन् ।

प्रहरीका अनुसार पुरुषमा आत्महत्याको दर बढी देखिनुमा मानसिक तनावलगायतका विभिन्न कारण जिम्मेवार रहेको हुनसक्ने देखिएको छ । जिल्ला प्रहरी कार्यालय सोलुखुम्बुका प्रहरी नायब उपरीक्षक नवीनराज बुढाथोकीका अनुसार आत्महत्या गर्नेमा १६ वर्षमुनिका एक जना, १६ देखि २५ वर्ष उमेर समूहका १५ जना, २६ देखि ३५ वर्षका १२ जना, ३६ देखि ४५ वर्षका १५ जना, ४६ देखि ६० वर्षका पाँच जना र ६० वर्षभन्दा माथिका १३ जना रहेका छन् ।

उमेर समूहका आधारमा हेर्दा १६ देखि २५ वर्ष तथा ३६ देखि ४५ वर्ष उमेर समूहमा आत्महत्याको संख्या बढी देखिएको छ । यस्तै, ६० वर्षभन्दा माथिका व्यक्तिमा पनि आत्महत्याको संख्या उल्लेख्य रहेको प्रहरीको तथ्याङ्कले देखाएको छ । प्रनाउ बुढाथोकीले पछिल्लो समय महिलाको तुलनामा पुरुषमा मानसिक तनाव बढी देखिनु, समस्या तथा तनाव व्यक्त गर्न नसक्नु र विभिन्न सामाजिक तथा पारिवारिक कारणले आत्महत्याको जोखिम बढेको हुनसक्ने बताउनुभयो ।

उहाँका अनुसार आत्महत्या न्यूनीकरणका लागि परिवार, समुदाय, विद्यालय, स्थानीय तह तथा सुरक्षा निकायबीच समन्वय आवश्यक छ । मानसिक समस्यालाई लुकाएर राख्नेभन्दा समयमै पहिचान गरी सम्बन्धित व्यक्ति तथा परिवारले सहयोग र परामर्श उपलब्ध गराउनुपर्ने उहाँको भनाइ छ । प्रहरीले आत्महत्या रोकथामका लागि जनचेतनामूलक कार्यक्रम सञ्चालन गर्दै आएको जनाएको छ ।

विद्यालय तथा समुदायस्तरमा मानसिक स्वास्थ्य, तनाव व्यवस्थापन, लागुऔषध दुव्र्यसन, घरेलु तथा लैङ्गिक हिंसा र आत्महत्या रोकथामसम्बन्धी सचेतना अभिवृद्धि गर्नुपर्नेमा सरोकारवालाले जोड दिएका छन् । मानसिक तनावमा रहेका व्यक्तिलाई एक्लै नछाड्ने, उसको कुरा ध्यानपूर्वक सुन्ने र समस्या गम्भीर देखिएमा स्वास्थ्यकर्मी वा मनोसामाजिक परामर्शदातासम्म पु¥याउने वातावरण बनाउन सके आत्महत्याका घटना न्यूनीकरण गर्न सकिने प्रहरीको सुझाव छ ।