भदौ ८, सोलुखुम्बु । निर्वाचनका बेला गरिएको प्रतिबद्धता कार्यान्वयन गर्दै प्रतिनिधिसभा सदस्यले आफ्नो सेवा–सुविधाबापत प्राप्त रकमबाट सोलुखुम्बुको एक विद्यालयलाई पाठ्यपुस्तक सहयोग गर्नुभएको छ। गत निर्वाचनका क्रममा आफू निर्वाचित भए प्रतिनिधिसभा सदस्यका रूपमा प्राप्त हुने सेवा–सुविधा व्यक्तिगत रूपमा नलिने र उक्त रकम सोलुखुम्बुको शिक्षा तथा स्वास्थ्य क्षेत्रमा खर्च गर्ने प्रतिबद्धता जनाइएको थियो।
सोही प्रतिबद्धताअनुसार आइतबार हिमाल दर्शन माध्यमिक विद्यालयका कक्षा ११ र १२ मा अध्ययनरत विद्यार्थीका लागि आवश्यक विभिन्न विधाका ६३ हजार रुपैयाँ बराबरका पाठ्यपुस्तक हस्तान्तरण गरिएको छ। उक्त पाठ्यपुस्तक विद्यालय व्यवस्थापन समितिका अध्यक्ष चन्द्र आचार्यलाई हस्तान्तरण गरिएको हो।
निर्वाचनका बेला व्यक्त गरिएको प्रतिबद्धतालाई व्यवहारमै उतार्दै शिक्षा क्षेत्रमा गरिएको यो सहयोगले विद्यार्थीको अध्ययनमा प्रत्यक्ष लाभ पुग्ने अपेक्षा गरिएको छ। सांसदका रूपमा प्राप्त सेवा–सुविधा व्यक्तिगत लाभका लागि नभई जिल्लाको विकास र नागरिकको हितमा प्रयोग गर्ने प्रतिबद्धताको सुरुआती कार्यका रूपमा यस सहयोगलाई हेरिएको छ ।
Discussion about this post