भोटेकोशी बाढीप्रति खिजीदेम्बा गाउँपालिकाद्वारा दुःख व्यक्त, उद्धार र राहतमा जुट्न अपिल

भाद्र १०, साेलुखुम्बु । ओखलढुङ्गाको खिजीदेम्बा गाउँपालिकाले भोटेकोशी नदीमा आएको आकस्मिक तथा विनाशकारी बाढीबाट भएको मानवीय तथा भौतिक क्षतिप्रति दुःख व्यक्त गर्दै प्रभावितको उद्धार, राहत तथा पुनर्स्थापनामा जुट्न अपिल गरेको छ ।

गाउँपालिकाका अध्यक्ष गम्बु शेर्पाले बुधबार जारी गरेको शोक वक्तव्यमा बाढीबाट प्रभावित तथा पीडितप्रति गहिरो दुःख र समवेदना व्यक्त गरिएको छ । बाढीका कारण आम नागरिक, बाह्य तथा आन्तरिक पर्यटक, राष्ट्रसेवक कर्मचारी, सुरक्षाकर्मी र विद्यार्थीसमेत प्रभावित भएको गाउँपालिकाले जनाएको छ ।

बाढीबाट नदी आसपासका बस्ती, सडक, पुल, जलविद्युत् आयोजना, व्यापारिक तथा सरकारी संरचनालगायत महत्वपूर्ण भौतिक पूर्वाधारमा ठूलो क्षति पुगेको गाउँपालिकाको भनाइ छ । बाढीको प्रभाव तल्लो तटीय क्षेत्रमा समेत फैलिएको र क्षतिको पूर्ण विवरण संकलन भइरहेको वक्तव्यमा उल्लेख छ ।

गाउँपालिकाले विपद्मा ज्यान गुमाएका नागरिकप्रति श्रद्धाञ्जली अर्पण गर्दै शोकसन्तप्त परिवारजनमा धैर्यधारण गर्ने शक्ति मिलोस् भन्ने कामना गरेको छ । साथै, विपद्बाट प्रभावित नागरिक, पर्यटक तथा जोखिममा रहेका आम सर्वसाधारणलाई तत्काल उद्धार, खोज, सुरक्षित पुनर्स्थापना तथा आवश्यक सहयोगका लागि सक्रिय हुन आग्रह गरेको छ ।

बाढीबाट प्रभावित नागरिकको उद्धार, राहत तथा पुनर्स्थापनालाई पहिलो प्राथमिकतामा राखी सङ्घ, प्रदेश र स्थानीय सरकारसँगै नेपाली सेना, नेपाल प्रहरी, सशस्त्र प्रहरी, स्वास्थ्यकर्मी, स्वयंसेवक तथा सम्पूर्ण सरोकारवालालाई एकजुट भएर परिचालन हुन गाउँपालिकाले अपिल गरेको छ ।

गाउँपालिकाले विपद्को घडीमा आवश्यक समन्वय, उद्धार, राहत तथा प्रभावित नागरिकलाई सहयोग गर्न सक्दो पहल गर्ने प्रतिबद्धता समेत जनाएको छ । गाउँपालिकाको शोक वक्तव्य अध्यक्ष गम्बु शेर्पाले बुधबार जारी गर्नुभएको हो ।