फाप्लु आँखा अस्पतालमा एक वर्षमा ३ हजार ९३३ जनाको आँखा परीक्षण

भदौ ११, सोलुखुम्बु । जिल्ला सामुदायिक आँखा अस्पताल फाप्लुमा एक वर्षको अवधिमा तीन हजार नौ सयभन्दा बढीले आँखा परीक्षण गराएका छन् । आर्थिक वर्ष २०८२÷८३ को साउनदेखि असार मसान्तसम्म तीन हजार ९३३ जनाले अस्पतालमा पुगेर आँखा जाँच गराएका हुन् । जिल्ला सामुदायिक आँखा अस्पताल फाप्लुका प्रमुख विद्धान ताम्राकारका अनुसार उक्त अवधिमा नयाँ बिरामी दुई हजार २१४ जना, पुराना बिरामी एक हजार ७०० जना र आकस्मिक सेवामार्फत १९ जनाले आँखा परीक्षण गराएका छन् ।

अस्पतालमा आँखा परीक्षणसँगै मोतिबिन्दु, आँखामा मासु पलाउनेलगायतका समस्याको उपचारसमेत गरिएको उहाँले जानकारी दिनुभयो । अस्पतालबाट आँखाको उपचारका साथै चस्मा, औषधि प्रयोगलगायतका सेवा प्रदान हुँदै आएको उहाँको भनाइ छ । पछिल्लो समय आँखाको नियमित परीक्षण गर्नुपर्छ भन्ने चेतना नागरिकमा बढ्दै गएकाले विगतको तुलनामा आँखा जाँच गराउनेको सङ्ख्या बढेको प्रमुख ताम्राकारले बताउनुभयो ।

उहाँले आँखामा कुनै समस्या नदेखिए पनि समय–समयमा आँखा परीक्षण गराउन आवश्यक रहेको बताउनुभयो । नियमित परीक्षण गर्दा आँखामा देखिन सक्ने समस्या समयमै पहिचान गरी उपचार गर्न सकिने उहाँको भनाइ छ ।