गार्मा माविको अक्षयकोषमा एक करोड १७ लाखभन्दा बढी रकम संकलन

भदौ १३, सोलुखुम्बु । सोलुखुम्बुको सोलुदुधकुण्ड नगरपालिका–७ स्थित गार्मा माध्यमिक विद्यालयको करोड अक्षयकोष अभियानमा हालसम्म एक करोड १७ लाख ४६ हजार २४७ रुपियाँ संकलन भएको छ। अभियानबाट संकलित रकममध्ये एक करोड १५ लाख रुपियाँ विद्यालयलाई अक्षयकोषका रूपमा हस्तान्तरण गरिएको हो । विद्यालयको शैक्षिक गुणस्तर अभिवृद्धि तथा आवश्यकताअनुसार दीर्घकालीन रूपमा उपयोग गर्ने उद्देश्यले अक्षयकोष स्थापना गरिएको हो।

अक्षयकोष संकलन अभियानमा हालसम्म १४४ जना दाताले योगदान गर्नुभएको आर्थिक सङ्कलन समितिका सह–संयोजक सोनाम ग्याल्जेन शेर्पाले जानकारी दिनुभयो। उहाँका अनुसार दक्षिण कोरियाको सोल, अमेरिका, काठमाडौँलगायत विभिन्न स्थानमा रहेका गार्मा माध्यमिक विद्यालयका पूर्वविद्यार्थी, अभिभावक, शुभेच्छुक तथा अन्य व्यक्तिको नेतृत्वमा अभियान सञ्चालन गरी रकम सङ्कलन गरिएको हो।

विद्यालयको शैक्षिक विकासमा दीर्घकालीन आर्थिक स्रोत सुनिश्चित गर्ने उद्देश्यले सुरु गरिएको अभियानमा स्वदेश तथा विदेशमा रहेका विद्यालयसँग सम्बन्धित व्यक्तिहरूको उल्लेख्य सहभागिता रहेको समितिले जनाएको छ। अभियानअन्तर्गत संकलित रकमलाई अक्षयकोषमा राखी त्यसबाट प्राप्त हुने आम्दानी विद्यालयको शैक्षिक गतिविधि तथा आवश्यक क्षेत्रमा खर्च गर्ने लक्ष्य राखिएको छ। अभियानमा हालसम्म संकलित रकम एक करोड रुपियाँभन्दा बढी पुगेपछि विद्यालयको दीर्घकालीन शैक्षिक विकासका लागि थप आधार तयार भएको विद्यालय पक्षले जनाएको छ।