खुम्बुपासाङल्हामुले बाढीपीडितका लागि २२ लाख २२ हजार दिने

भाद्र १४, सोलुखुम्बु । रसुवा जिल्लाको भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि खुम्बु पासाङल्हामु गाउँपालिकाले २२ लाख २२ हजार रुपैयाँ सहयोग गर्ने भएको छ । गाउँपालिकाले आइतबार जारी गरेको प्रेस विज्ञप्तिमार्फत प्रधानमन्त्री दैवी प्रकोप उद्धार कोषमा २२ लाख २२ हजार रुपैयाँ जम्मा गर्ने निर्णय गरेको जनाएको हो । गाउँपालिका अध्यक्ष मिङ्मा छिरी शेर्पाद्वारा जारी विज्ञप्तिअनुसार उक्त रकम गाउँपालिकाको तर्फबाट बाढी प्रभावितका लागि सहयोगस्वरूप उपलब्ध गराउन लागिएको हो । यस्तै विपदको समयमा गाउँपालिकाका जनप्रतिनिधिहरूले पनि आफ्नो एक महिनाको सेवा–सुविधाबराबरको रकमसमेत प्रधानमन्त्री दैवी प्रकोप उद्धार कोषमा जम्मा गर्ने निर्णय गरेका छन् । यसबाट गाउँपालिकाको सहयोग २२ लाख २२ हजार रुपैयाँमा मात्र सीमित नरहने देखिन्छ ।

यद्यपि जनप्रतिनिधिहरूको एक महिनाको सेवा–सुविधाबराबरको ठ्याक्कै कति रकम थपिने हो भन्ने विवरण विज्ञप्तिमा खुलाइएको छैन । गाउँपालिकाले घोषणा गरेको २२ लाख २२ हजार रुपैयाँ बाढीपीडितलाई गाउँपालिकाले प्रत्यक्ष वितरण गर्ने रकम नभई प्रधानमन्त्री दैवी प्रकोप उद्धार कोषमा जम्मा गरिने रकम हो । त्यसपछि प्रचलित सरकारी संयन्त्र र निर्णयअनुसार उक्त कोषमार्फत राहत तथा पुनःस्थापनाका कार्यमा रकम परिचालन हुनेछ । खुम्बु पासाङल्हामु आफैं पनि हिमाली तथा नदीजन्य विपद्को जोखिममा रहेको क्षेत्र हो । यसअघि २०८१ सालमा गाउँपालिकाको थामेमा आएको विनाशकारी बाढीले घर, विद्यालय, स्वास्थ्यचौकी तथा पर्यटकीय पूर्वाधारमा ठूलो क्षति पु¥याएको थियो ।

त्यसपछि खुम्बु क्षेत्रले विपद्को प्रत्यक्ष पीडा भोगेको पृष्ठभूमिमा अहिले अर्को जिल्लाका बाढीपीडितलाई सहयोग गर्ने निर्णयलाई मानवीय ऐक्यबद्धताका रूपमा हेर्न सकिन्छ । गाउँपालिकाले विपद् कुनै भूगोल, समुदाय वा स्थानीय तहको मात्र समस्या नभई साझा चुनौती भएकाले सरकारी तथा गैरसरकारी निकाय, संघसंस्था, निजी क्षेत्र र आम नागरिकलाई आ–आफ्नो क्षेत्रबाट सहयोग गर्न अपिलसमेत गरेको छ । यससँगै खुम्बु पासाङल्हामु गाउँपालिकाले आगामी दिनमा भोटेकोशी बाढी प्रभावितको उद्धार, राहत, पुनःस्थापना तथा पुनर्निर्माणका काममा आवश्यक सहयोग र सहकार्यका लागि आफू प्रतिबद्ध रहेको जनाएको छ ।