सोलुदुधकुण्ड–४ फाप्लु जिल्लाकै तेस्रो बालमैत्री वडा घोषित

असोज २५, सोलुखुम्बु । सोलुखुम्बुको सोलुदुधकुण्ड नगरपालिका–४ फाप्लु जिल्लाकै तेस्रो बालमैत्री स्थानीय शासनयुक्त वडा बनेको छ । आइतबार आयोजित समारोहमा जिल्ला समन्वय समिति सोलुखुम्बुका प्रमुख कृष्णप्रसाद निरौलाले वडालाई बालमैत्री स्थानीय शासनयुक्त वडा घोषणा गर्नुभएको हो । बालमैत्री वडा निर्माणका लागि निर्धारित ५१ वटै सूचक क्रमशः पूरा गर्दै वडालाई बालमैत्री घोषणा गरिएको जनाइएको छ ।

‘बालबालिकामा लगानी, सबैको सरोकार, बालमैत्री नगर, विकास र समृद्धिको आधार’ भन्ने नारासहित २०८१ चैत ३ गतेदेखि घोषणा अभियान सुरु गरिएको थियो । बालमैत्री पूर्वाधार निर्माण, आवश्यक नीति तथा कार्यक्रम तर्जुमा र बालमैत्री व्यवहार प्रवद्र्धनलगायतका काम गर्दै लामो प्रयासपछि वडा घोषणा गर्न सफल भएको जनाइएको छ । वडाका ३१९ घरधुरीमा बसोबास गर्ने १ हजार ४१३ परिवारले बालमैत्री व्यवहारलाई प्राथमिकता दिँदै बालअधिकार संरक्षणमा प्रतिबद्धता जनाएको बताइएको छ ।

वडाध्यक्ष तथा कार्यक्रमका सभापति युवास तामाङले लामो मेहनतपछि वडालाई बालमैत्री बनाउन सफल भएको बताउनुभयो । उहाँले वडामा बालअधिकार हनन, बालश्रमलगायतका अधिकारविपरीतका गतिविधि हुन नदिने प्रतिबद्धता व्यक्त गर्नुभयो । बालबालिकालाई सही मार्गदर्शन र अभिभावकत्व प्रदान गर्न सके त्यसले समाज र राष्ट्रको विकासमा समेत योगदान पुग्ने उहाँको भनाइ थियो । कार्यक्रममा सहभागी विभिन्न सरोकारवाला निकायका प्रतिनिधिहरूले बालमैत्री वडा घोषणा हुनु सकारात्मक उपलब्धि भए पनि यसको दिगो कार्यान्वयनमा सबै पक्षले ध्यान दिनुपर्नेमा जोड दिएका थिए ।

प्रमुख अतिथि निरौलाले बालबालिकाको सर्वाङ्गीण विकासका लागि राज्यले निर्धारण गरेका ५१ वटा सूचकको प्रभावकारी कार्यान्वयन महत्त्वपूर्ण हुने बताउनुभयो । उहाँले बालबालिकाको भविष्य उज्ज्वल बनाउन उचित शिक्षा र अनुशासनसँगै अभिभावक तथा शिक्षकको भूमिका महत्त्वपूर्ण रहने उल्लेख गर्नुभयो । पछिल्लो समय प्रविधिको प्रयोगका क्रममा बालबालिका विभिन्न जोखिममा पर्न सक्ने भन्दै उहाँले त्यस्ता जोखिमबाट जोगाउन घरपरिवारबाटै सचेतना र निगरानी आवश्यक रहेको बताउनुभयो ।