सबिना राई, असोज ३०, सोलुखुम्बु । नेपाल विद्युत् प्राधिकरण सोलुखुम्बु वितरण केन्द्रले दसैँ पर्वका अवसरमा उपभोक्तालाई नियमित, भरपर्दो र गुणस्तरीय विद्युत् सेवा उपलब्ध गराउन आवश्यक तयारी गरेको छ । दसैँ अवधिमा विद्युत् आपूर्तिमा हुन सक्ने अवरोध न्यूनीकरण गर्न तथा समस्या देखिएमा तत्काल मर्मतसम्भार गरी सेवा सञ्चालन गर्न प्राविधिक टोलीलाई तयारी अवस्थामा राखिएको केन्द्रका प्रमुख लालबहादुर लम्सालले जानकारी दिनुभयो ।
उहाँका अनुसार विद्युत् माग र आपूर्तिको अवस्थालाई निरन्तर निगरानी गर्दै विद्युत् प्रणालीमा समस्या आउन नदिन आवश्यक सतर्कता अपनाइएको छ । चाडपर्वका समयमा विद्युत् सेवा नियमित राख्न प्राविधिक टोलीलाई आवश्यक समन्वय र तयारीसहित परिचालन गर्ने व्यवस्था मिलाइएको उहाँले बताउनुभयो । यसैगरी, केन्द्रले दसैँका समयमा विद्युत्को सुरक्षित प्रयोग गर्न उपभोक्तालाई आग्रह गरेको छ ।
घरमा प्रयोग हुने विद्युतीय उपकरण तथा तारको अवस्था जाँच गर्न, गुणस्तरहीन विद्युतीय सामग्री प्रयोग नगर्न र विद्युत् चुहावट वा तारमा समस्या देखिएमा आफैँ मर्मत नगरी दक्ष प्राविधिकको सहयोग लिन केन्द्रले अनुरोध गरेको छ । चाडपर्वका समयमा विद्युत्को खपत बढ्न सक्ने भएकाले विद्युतीय उपकरणको प्रयोगमा सावधानी अपनाउन तथा सम्भावित दुर्घटनाबाट बच्न आवश्यक सुरक्षा उपाय अवलम्बन गर्नसमेत प्राधिकरणले उपभोक्तालाई आग्रह गरेको छ ।
Discussion about this post