आज फूलपाती भित्र्याइँदै, नवदुर्गाको पूजा–आराधना गरी मनाइँदै

असोज ३१, सोलुखुम्बु । नेपाली हिन्दू धर्मावलम्बीले आज दसैँको सातौँ दिन फूलपाती भित्र्याएर नवदुर्गाको पूजा–आराधना गर्दैछन्। बडादसैँको महत्त्वपूर्ण दिनका रूपमा लिइने फूलपातीलाई शक्ति, समृद्धि, सुख र मङ्गलको प्रतीकका रूपमा लिने गरिन्छ। परम्पराअनुसार फूलपातीका दिन घरघरमा विधिपूर्वक फूलपाती भित्र्याई दुर्गा भवानीको पूजा गर्ने चलन छ। नेपाल पञ्चाङ्ग निर्णायक विकास समितिका अनुसार आज बिहान ७ बजेर ३७ मिनेटको शुभ साइतमा फूलपाती भित्र्याउन सकिने जनाइएको छ।

शास्त्रीय मान्यताअनुसार फूलपातीमा नौ प्रकारका वनस्पति समावेश गरिन्छ। केरा, बेसार, हलेदो, जयन्ती, बेल, अनार, अशोकको वृक्ष, माने–कर्कलो र धानलाई नौ पत्रिकाका रूपमा पूजा गर्ने परम्परा रहेको छ। यी वनस्पतिलाई धार्मिक आस्था, प्रकृति र समृद्धिसँग जोडेर हेर्ने गरिन्छ। फूलपातीका अवसरमा गोरखाबाट ल्याइएको फूलपातीलाई विधिपूर्वक काठमाडौँस्थित हनुमानढोका दरबारको दसैँघरमा भित्र्याउने परम्परा छ।

उक्त अवसरमा नेपाली सेना, सांस्कृतिक समूह तथा सर्वसाधारणको सहभागितामा विशेष समारोह आयोजना गरिन्छ। दसैँको धार्मिक तथा सांस्कृतिक महत्त्व बोकेको फूलपातीले नेपाली मौलिक परम्परा, प्रकृतिप्रतिको सम्मान, पारिवारिक एकता र सामाजिक सद्भावलाई प्रतिबिम्बित गर्छ। फूलपाती भित्र्याएसँगै दसैँको रौनक थप बढ्ने र घरघरमा विजयादशमीको तयारी तीव्र हुने गर्दछ।