निर्माण व्यवसायी फेरिएपछि पूरा भयो खोटाङ अस्पतालको अलपत्र भवन

कार्तिक २०, सोलुखुम्बु । सघन सहरी तथा भवन निर्माण आयोजना कार्यालय ओखलढुङ्गाले जिल्ला अस्पताल खोटाङलाई ५० शय्याको सुविधासम्पन्न अस्पताल भवन हस्तान्तरण गरेको छ । नेपाल सरकारको २२ करोड ९० लाख ४७ हजार ९२ रुपैयाँ लागतमा निर्माण गरिएको चारतले अस्पताल भवन बिहीबार औपचारिक रूपमा हस्तान्तरण गरिएको हो ।

सघन सहरी तथा भवन निर्माण आयोजना कार्यालय ओखलढुङ्गाका प्रमुख इन्जिनियर सुरज पौडेलले जिल्ला अस्पताल खोटाङका निमित्त प्रमुख डा. पुस्कल राईलाई भवन हस्तान्तरणसम्बन्धी प्रमाणपत्र प्रदान गर्नुभएको हो । भवन हस्तान्तरण भएसँगै तिहारपछि नयाँ भवनबाट अस्पतालका सेवा सञ्चालन गर्ने तयारी गरिएको अस्पताल सञ्चालन तथा व्यवस्थापन समितिका अध्यक्ष एवम् जिल्ला समन्वय समिति खोटाङका प्रमुखले जानकारी दिनुभयो । विसं २०७८ असार २४ गते निर्माण सम्झौता भई ३० महिनाभित्र सम्पन्न गर्ने लक्ष्य राखिएको अस्पताल भवन निर्माणको काम निर्धारित समयमा पूरा हुन सकेको थिएन । श्यामसुन्दर–रामसागर–नेपाल फूलबारी जेभीले निर्माणको जिम्मा लिएको भवन लामो समयसम्म अलपत्र बनेपछि पटकपटक ताकेता गरिएको थियो ।

निर्माण कम्पनीले काम अघि नबढाएपछि कारबाही प्रक्रिया सुरु भएसँगै जिल्लाकै निर्माण व्यवसायी सुनिल राईलाई निर्माणको जिम्मेवारी दिइएको थियो । उहाँले निर्माणको जिम्मा लिएपछि बाँकी काम सम्पन्न गरी आयोजना कार्यालयलाई भवन हस्तान्तरण गर्नुभएको हो । तुवाचुङ कन्ट्रक्सन प्रालिका प्रबन्ध निर्देशकसमेत रहनुभएका राईले आफ्नै जिल्लाको अस्पताल भवन निर्माणमा योगदान गर्न पाउँदा खुसी लागेको बताउनुभयो ।

लामो समयदेखि अधुरो रहेको भवन निर्माण सम्पन्न गर्न सहयोग गर्ने सबै पक्षलाई आयोजना कार्यालयका प्रमुख इन्जिनियर पौडेलले धन्यवाद व्यक्त गर्नुभयो । विसं २०४९ वैशाख १ गते १५ शय्याको सेवासहित स्थापना भएको जिल्ला अस्पताललाई ३३ वर्षपछि ५० शय्यामा स्तरोन्नति गरिएको हो । विसं २०८२ असार २२ गते कोशी प्रदेश सरकारका तत्कालीन स्वास्थ्य तथा भौतिक पूर्वाधार विकासमन्त्री भूपेन्द्र राईले ५० शय्याको सेवा शुभारम्भ गर्नुभएको थियो । तर, आवश्यक भौतिक पूर्वाधार निर्माण सम्पन्न नहुँदै सेवा शुभारम्भ गरिएको भन्दै त्यतिबेला सामाजिक सञ्जालमा आलोचनासमेत भएको थियो । भवन अभावका कारण अस्पतालका सेवा सञ्चालनमा कठिनाइ हुँदै आएको थियो ।

लिफ्ट सुविधासहित निर्माण गरिएको चारतले आरसिसी भवनको पहिलो तलामा बहिरङ्ग सेवा ९ओपीडी०, आकस्मिक कक्ष, शल्यक्रिया कक्ष, एक्स–रे कक्ष, फार्मेसी तथा सुरक्षा कक्ष रहेका छन् । दोस्रो तलामा प्रसूति सेवा तथा प्रसूतिसम्बन्धी शल्यक्रियाका लागि आवश्यक संरचना निर्माण गरिएको छ ।

त्यसैगरी, तेस्रो तलामा सघन उपचार कक्ष ९आइसीयू०, आइसोलेसन कक्ष तथा क्याबिन र चौथो तलामा प्रशासन, लेखा तथा सेमिनार हललगायतका संरचना रहेका छन् । नयाँ भवनबाट सेवा सञ्चालनमा आएपछि जिल्लावासीलाई उपचारका लागि जिल्ला बाहिर जानुपर्ने बाध्यता कम हुनुका साथै अस्पतालको सेवा प्रवाह थप सहज र प्रभावकारी हुने अपेक्षा गरिएको छ ।