दुधकोशी नदीको बीचमा अड्किएको शव निकालियो

कातिक २१, सोलुखुम्बु। सोलुखुम्बुको माप्य दुधकोशी गाउँपालिका–३, लेम्चीस्थित दुधकोशी नदीको बीच भागमा ढुङ्गाको चेपमा अड्किएको अवस्थामा फेला परेको एक शव प्रहरीले उद्धार गरेको छ। शुक्रबार दिउँसो करिब २ बजे स्थानीयवासीले नदीको किनारबाट करिब १० मिटर भित्र ढुङ्गाको चेपमा मानिसको जस्तो देखिने शव रहेको जानकारी प्रहरीलाई गराएका थिए।

सूचना प्राप्त हुनासाथ जिल्ला प्रहरी कार्यालय सोलुखुम्बुबाट प्रहरी निरीक्षक मौसम तामाङको कमाण्डमा पाँच जना र सशस्त्र प्रहरी बल नेपाल, गुल्म हेडक्वार्टर सल्लेरीबाट प्रहरी सहायक निरीक्षक फुरी शेर्पाको कमाण्डमा नौ जनाको संयुक्त टोली घटनास्थल पुगेको थियो। प्रहरी र सशस्त्र प्रहरीको संयुक्त टोलीले नदीको बीच भागमा ढुङ्गाको चेपमा अड्किएको अवस्थामा रहेको शव सुरक्षित रूपमा उद्धार गरेको हो। उद्धार गरिएको शवको पहिचान तथा घटनाको प्रकृतिबारे आवश्यक अनुसन्धान भइरहेको प्रहरीले जनाएको छ। घटनासम्बन्धी थप कानुनी प्रक्रिया अगाडि बढाइएको छ।