तिहार सुरु भएसँगै सल्लेरीको नयाँ बजारमा चहलपहल बढ्यो

कार्तिक २१, सोलुखुम्बु । नेपालीहरूको दोस्रो ठूलो चाड तिहार सुरु भएसँगै सोलुखुम्बुको सदरमुकाम सल्लेरीस्थित नयाँ बजारमा चहलपहल बढेको छ । प्रत्येक शनिबार लाग्ने नयाँ बजारमा तिहारका लागि आवश्यक सामग्री खरिद गर्न आउने सर्वसाधारणको भीड लागेको हो । तिहारका लागि आवश्यक पूजासामग्री, लत्ताकपडा, ढाकाटोपी, फलफूल तथा भाइमसलालगायत सामग्री खरिद गर्न गाउँगाउँबाट सर्वसाधारण बजार आएका छन् ।

बजारमा बिहानैदेखि किनमेल गर्नेको चहलपहल देखिएको छ । हाटबजारमा ढाकाटोपी, कपडा, सगुन, फलफूल, ओखर, कटुस, बदाम, काजु, किसमिस, रङ तथा देवीदेवताका तस्बिर खरिद गर्ने ग्राहकको भीड लागेको छ । तिहारमा घर सजावट तथा पूजाका लागि प्रयोग गरिने रङ, बत्ती र माटाका पाला लगायत सामग्रीको बिक्रीसमेत बढेको व्यापारीहरूले बताएका छन् ।

चाडपर्वका लागि आवश्यक सामग्री खरिद गर्न ग्रामीण क्षेत्रबाट समेत सर्वसाधारण बजार आउन थालेपछि सल्लेरीको नयाँ बजारमा व्यापारिक गतिविधि बढेको छ । यस वर्ष तिथिको घटबढका कारण सायंकालमा कात्तिक कृष्ण त्रयोदशी परेका दिन शुरु हुने यमपञ्चक हिजो बेलुकीदेखि नै शुरु भएको छ । यमदीप दान हिजोदेखि नै शुरु भएको हो । गरगहना एवम् तामाका भाँडाकुँडा किन्ने धनतेरस पर्व हिजो नै मनाइएको छ ।

भोलि नरक चतुर्दशी, कुकुर तिहार र लक्ष्मीपूजा परेको छ । पर्सि २३ गते गाईपूजा तथा २४ गते गोवर्धन पूजा, गोरुपूजा, बलिपूजा, हलितिहार तथा म्हपूजा मनाइनेछ । २४ गतेदेखि नेपाल संवत् ११४७ पनि शुरु हुनेछ । यमपञ्चकको अन्तिम दिन अर्थात् २५ गते बुधबार यमद्वितीया तथा भाइटीका मनाइन्छ । नेपाल पञ्चाङ्ग निर्णायक विकास समितिका अनुसार भाइटीकाका लागि बिहान ११ बजेर ७ मिनेटको साइत उत्तम छ ।