सबिना राई, कातिक २६, सोलुखुम्बु । सोलुखुम्बुको माप्य दुधकोशी गाउँपालिकाले प्रकृति, पर्यटन, खेलकुद र युवा एकतालाई प्रवद्र्धन गर्ने उद्देश्यले वृहत् ‘साङ्गीतिक साँझ–२०८३’ तथा जिल्लाव्यापी खेलकुद प्रतियोगिता आयोजना गर्ने भएको छ । गाउँपालिकाको आयोजनामा मङ्सिर १८ गतेदेखि कोर्कु रङ्गशालामा उक्त विशेष सांस्कृतिक तथा खेलकुद महोत्सव सञ्चालन हुन लागेको हो ।
‘गन्तव्य : माप्य दुधकोशी– प्रकृति, पर्यटन, खेलकुद र युवा एकता’ भन्ने मूल नाराका साथ आयोजना हुन लागेको साङ्गीतिक साँझमा राष्ट्रिय तथा स्थानीय स्तरका चर्चित कलाकारहरूको बेजोड प्रस्तुति रहने जनाइएको छ । बेलुकी ५ बजेपछि सुरु हुने साङ्गीतिक साँझमा लोकप्रिय लोक–रक ब्यान्ड ‘कर्मा ब्यान्ड’ का संस्थापक तथा मुख्य गायक सुरेन्द्रमान सिंह, चर्चित लोकदोहोरी गायक बद्री पंगेनी र ‘द भ्वाइस अफ नेपाल सिजन–५’ का सेकेन्ड रनरअप तथा स्थानीय प्रतिभा कुमार प्रयास राईको विशेष प्रस्तुति रहने छ ।
साथै, गाउँपालिकाभित्रका विभिन्न जातजातिका मौलिक लोकनृत्य र स्थानीय कलाकारहरूको गायन तथा सांस्कृतिक प्रस्तुतिसमेत समावेश गरिने गाउँपालिकाका उपाध्यक्ष गौरव राईले जानकारी दिनुभयो । स्थानीय कला, संस्कृतिको संरक्षण गर्दै स्थानीय कलाकारलाई राष्ट्रिय कलाकारसँग एउटै मञ्चमा जोड्ने र मनोरञ्जनसँगै आन्तरिक तथा बाह्य पर्यटन प्रवद्र्धन गर्ने कार्यक्रमको मुख्य उद्देश्य रहेको छ ।
यसै अवसरमा गाउँपालिकाले मङ्सिर १८ गतेदेखि नै सोलुखुम्बु जिल्लाव्यापी खुल्ला महिला तथा पुरुष टेबल टेनिस (सिंगल) र चेस प्रतियोगितासमेत सञ्चालन गर्ने भएको छ । गाउँपालिकाका निमित्त प्रमुख प्रशासकीय अधिकृत जितेन्द्र कुमार यादवका अनुसार दुवै प्रतियोगिता अन्तर्राष्ट्रिय महासङ्घ (आइटिटिएफ र फिडे) को प्रचलित नियमअनुसार सञ्चालन गरिने छ ।
नकआउट प्रणालीमा खेलाइने टेबल टेनिसको महिला र पुरुष सिंगल विधा तथा खुल्ला चेस प्रतियोगिताका विजेताहरूलाई आकर्षक नगद पुरस्कारको व्यवस्था गरिएको छ । दुवै प्रतियोगितामा प्रथम, द्वितीय र तृतीय हुने खेलाडीलाई क्रमशः १० हजार, सात हजार र पाँच हजार रुपियाँ नगदसहित प्रमाणपत्र प्रदान गरिने गाउँपालिकाले जनाएको छ । खेलकुद र पर्यटनलाई सांस्कृतिक गतिविधिसँग जोड्दै माप्य दुधकोशीलाई आकर्षक पर्यटकीय गन्तव्यका रूपमा स्थापित गर्न यो कार्यक्रम कोसेढुङ्गा साबित हुने विश्वास लिइएको छ ।
Discussion about this post