सल्लेरीमा मंसिर १२ गते तेस्रो ‘रेड पाण्डा म्याराथन’ आयोजना हुने

कातिक २९, सोलुखुम्बु । सोलुखुम्बुको सल्लेरीमा आगामी मंसिर १२ गते ‘रेड पाण्डा म्याराथन २०२६’ को तेस्रो संस्करण आयोजना हुने भएको छ । रेड पाण्डा संरक्षणसँगै सोलुखुम्बुको पर्यटन प्रवर्द्धन गर्ने उद्देश्यले प्रतियोगिता आयोजना गर्न लागिएको हो । रेड पाण्डा नेटवर्कको आयोजना तथा प्ले फर नेचरको मुख्य आर्थिक सहयोगमा हुने प्रतियोगिताको स्थानीय साझेदार हिमाली स्वास्थ्य तथा वातावरणीय सेवा सोलुखुम्बु रहेको छ । प्रतियोगितामा प्रख्यात अभिनेता तथा रेड पाण्डा नेटवर्कका संरक्षण एम्बासेडर दयाहाङ राईसमेत सहभागी हुने आयोजकले जनाएको छ ।

हिमाली स्वास्थ्य तथा वातावरणीय सेवा सोलुखुम्बुका अध्यक्ष ङिमा तेण्डुप शेर्पाका अनुसार अन्तर्राष्ट्रिय रेड पाण्डा दिवसको अवसरमा आयोजना गरिने म्याराथनले तल्लो सगरमाथा क्षेत्रलाई साहसिक पर्यटन गन्तव्यका रूपमा अन्तर्राष्ट्रियस्तरमा चिनाउन सहयोग पुर्याउनेछ । ४८ किलोमिटर लामो मुख्य म्याराथन सल्लेरीस्थित समुद्री सतहबाट दुई हजार ३६० मिटर उचाइमा रहेको थेकछेन पेमा छोलिङ गुम्बाबाट सुरु हुनेछ । प्रतियोगीहरू चार हजार ५४ मिटर उचाइको पिके पिक पुगेर पुनः सुरुआती स्थानमै फर्किएपछि दौड पूरा हुनेछ । यस क्रममा धावकहरूले दुई हजार ८७२ मिटरभन्दा बढी उचाइ पार गर्नुपर्नेछ ।

सात घण्टा ३० मिनेटभित्र दूरी पूरा गर्नुपर्ने प्रतियोगितालाई अन्तर्राष्ट्रिय ट्रेल रनिङ एसोसिएसनले तीन पोइन्ट प्रदान गरेको छ । यस वर्ष स्थानीय समुदाय तथा सबै उमेर समूहका व्यक्तिको सहभागिता बढाउने उद्देश्यले पहिलोपटक पाँच किलोमिटर लामो ‘रेड पाण्डा फन रन’ समेत समावेश गरिएको छ । थेकछेन पेमा छोलिङ गुम्बाबाट सुरु हुने फन रन सेर्गा खोप हुँदै फाप्लु गुम्बामा पुगेर समापन हुनेछ । उक्त दौडमा अभिनेता दयाहाङ राईले पनि सहभागीहरूसँगै दौडिने कार्यक्रम रहेको आयोजकले जनाएको छ ।

हिमाली वातावरण र प्राकृतिक सम्पदाको संरक्षणप्रति नयाँ पुस्तामा जिम्मेवारीबोध गराउनु प्रतियोगिताको अर्को उद्देश्य रहेको अध्यक्ष शेर्पाले बताउनुभयो । उहाँका अनुसार वनजङ्गलमा मानिसले प्रत्यक्ष रूपमा नदेखेका धेरै अमूल्य प्राकृतिक सम्पदा छन् । रेड पाण्डा पनि त्यस्तै महत्वपूर्ण सम्पदामध्ये एक हो । यस्ता कार्यक्रमले स्थानीय प्राकृतिक सम्पदालाई नजिकबाट बुझ्ने अवसर दिनुका साथै यसको संरक्षण वर्तमान र भावी पुस्ताको साझा जिम्मेवारी हो भन्ने सन्देश प्रवाह गर्ने विश्वास अध्यक्ष शेर्पाले व्यक्त गर्नुभयो ।

प्रतियोगितामा सहभागी हुन इच्छुक धावकले आयोजक संस्थाको आधिकारिक वेबसाइटमार्फत अनिवार्य दर्ता गराउनुपर्नेछ । यसअघि सन् २०२४ मा ताप्लेजुङको पाथीभरा र सन् २०२५ मा इलाममा म्याराथनका दुई संस्करण सम्पन्न भएका थिए । ती प्रतियोगितामा नेपालका १६ भन्दा बढी जिल्लाका साथै भारत र जापानका गरी एक सय ४० धावकले सहभागिता जनाएका थिए ।