रूखबाट लडेर गम्भीर घाइते भएका भट्टराईको उपचारका क्रममा निधन

कातिक २९, सोलुखुम्बु । सोलुखुम्बुको नेचासल्यान गाउँपालिका–३ निवासी ५१ वर्षीय एकनाथ भट्टराईको रूखबाट लडेर मृत्यु भएको छ । आइतबार बिहान करिब ९ बजे बडहरको रूखबाट लडेर गम्भीर घाइते हुनुभएका भट्टराईको दिउँसो २ बजे नेचा अस्पतालमा उपचारका क्रममा मृत्यु भएको हो । घटनापछि उहाँको उद्धार तथा उपचारका लागि हेलिकप्टरको व्यवस्था गर्ने प्रयास गरिए पनि समयमै उपलब्ध हुन नसकेको स्थानीयले बताएका छन् ।

हेलिकप्टर समयमै उपलब्ध हुन नसक्दा उद्धार र उपचार प्रक्रियामा ढिलाइ भएको उनीहरूको भनाइ छ । दुर्गम पहाडी क्षेत्रमा आपत्कालीन उद्धार तथा स्वास्थ्य सेवाको सहज पहुँच नहुँदा बिरामी र घाइतेले समयमै उपचार पाउन नसकेको भन्दै स्थानीयले चिन्ता व्यक्त गरेका छन् । भट्टराईको निधनले परिवारजन तथा स्थानीय समुदाय शोकमा परेको छ । उहाँको निधनप्रति विभिन्न क्षेत्रका व्यक्तिहरूले दुःख व्यक्त गर्दै शोकसन्तप्त परिवारजनमा समवेदना प्रकट गरेका छन् ।