मंसिर २, सोलुखुम्बु । सोलुखुम्बुको महाकुलुङ गाउँपालिका वडा नम्बर १ का वडा अध्यक्ष पर्खिधन राईले गाउँपालिकाभित्रको विद्युत व्यवस्थापनको जिम्मा तत्काल लिन नेपाल विद्युत प्राधिकरण र ऊर्जा मन्त्रालयलाई आग्रह गर्नुभएको छ । सामाजिक सञ्जालमार्फत एक भिडियो सन्देश जारी गर्दै उहाँले लामो समयदेखिको विद्युत समस्या समाधानका लागि सम्बन्धित निकायको ध्यानाकर्षण गराउनुभएको हो ।
वडाध्यक्ष राईका अनुसार महाकुलुङ गाउँपालिकामा विगत तीन वर्षदेखि राष्ट्रिय प्रसारण लाइनको विद्युत विस्तार भई स्थानीय स्तरमा ’सामुदायिक ग्रामीण विद्युत वितरण संस्था’ मार्फत व्यवस्थापन हुँदै आएको थियो । तर, दुर्गम भौगोलिक अवस्था र प्राविधिक कठिनाइका कारण स्थानीय संस्थाले विद्युत व्यवस्थापन गर्न नसक्ने भएपछि गाउँपालिकाको कार्यपालिकाले करिब एक वर्षअघि नै विद्युत प्राधिकरणलाई हस्तान्तरण गर्ने निर्णय गरिसकेको उहाँले बताउनुभयो ।
गाउँपालिकाले गत असार मसान्तसम्मको सम्पूर्ण बक्यौता तथा हरहिसाब चुक्ता गरिसकेको र साउन महिनादेखि प्राधिकरणले नै पूर्ण रूपमा व्यवस्थापनको जिम्मा लिनुपर्ने भए तापनि हालसम्म कुनै सुनुवाइ नभएको राईले गुनासो गर्नुभयो । “साउनयता विद्युतको महसुलसमेत उठेको छैन, प्राविधिकहरू खटाइएको छैन र व्यवस्थापन पक्ष पूर्ण रूपमा अलपत्र छ,“ उहाँले भिडियोमा भन्नुभएको छ ।
वडाध्यक्ष राईले गाउँपालिकाभित्रका चारवटा ट्रान्सफर्मर करिब एक वर्षदेखि बिग्रिएर थन्किएको जानकारी दिनुभयो । मर्मतका लागि पटक–पटक अनुरोध गर्दा प्राधिकरणका कर्मचारीले ट्रान्सफर्मर बोकेर विराटनगर पठाउन भनेको उल्लेख गर्दै उहाँले दुर्गम ठाउँबाट उक्त कार्य स्थानीयको क्षमताभन्दा बाहिर रहेको स्पष्ट पार्नुभयो ।
साथै, मागअनुसार समयमा मिटर बक्ससमेत उपलब्ध नहुँदा स्थानीय बासिन्दा मर्कामा परेको उहाँको भनाइ छ । सम्बन्धित निकायमा पटक–पटक भेटघाट र टेलिफोनमार्फत आग्रह गर्दा पनि समस्या समाधान नभएपछि बाध्य भएर सामाजिक सञ्जालको सहारा लिनुपरेको उहाँले बताउनुभएको छ ।










Discussion about this post