मंसिर ३, सोलुखुम्बु । सोलुखुम्बुको सोलुदुधकुण्ड नगरपालिकाका दुई सामुदायिक विद्यालयका १११ जना विद्यार्थीलाई न्यानो कपडा तथा शैक्षिक सामग्री वितरण गरिएको छ । समाजसेवी लक्ष्मण कार्कीको नेतृत्वमा सञ्चालित गाउँ सहर फाउण्डेसनले बिहीबार नगरपालिकाको वडा नम्बर ७ गार्मामा रहेका सेकारसिंह आधारभूत विद्यालय र सिद्धार्थ आधारभूत विद्यालयका विद्यार्थीलाई विभिन्न सामग्री वितरण गरेको हो ।
फाउण्डेसनले सेकारसिंह आधारभूत विद्यालयका ७३ जना र सिद्धार्थ आधारभूत विद्यालयका ३८ जना गरी कुल १११ विद्यार्थीलाई ट्र्याकसुट, कापी, कलम, साबुन, दन्तमञ्जनलगायतका सामग्री हस्तान्तरण गरेको छ । वडा सदस्य तथा कार्यवाहक वडा अध्यक्ष भलाकाजी कार्कीको प्रमुख आतिथ्यतामा आयोजित कार्यक्रममा सम्बन्धित विद्यालयका विद्यालय व्यवस्थापन समिति अध्यक्षहरूको अध्यक्षतामा सामग्री वितरण गरिएको थियो । हाल गाउँ सहर फाउण्डेसनले सोलुदुधकुण्ड नगरपालिकाका सातवटा विद्यालयमा विभिन्न कार्यक्रम सञ्चालन गरिरहेको छ ।
सामग्री प्राप्त गरेपछि आर्थिक रूपमा विपन्न तथा अभिभावकको कमजोर आर्थिक अवस्थाका कारण आवश्यक शैक्षिक सामग्री जुटाउन कठिनाइ भोगिरहेका विद्यार्थीलाई यसले राहत पुग्ने विद्यालयका प्रधानाध्यापकहरूले बताएका छन् । सामुदायिक विद्यालयको शैक्षिक गुणस्तर सुधार तथा विद्यार्थीको शैक्षिक उन्नयनमा विभिन्न संघसंस्थाले पु¥याएको सहयोगको विद्यालय व्यवस्थापन समिति अध्यक्षहरूले प्रशंसा गरेका छन् ।
उनीहरूले सहयोगी संस्था गाउँ सहर फाउण्डेसन तथा संस्थाका दाता मिस्टर विट र उहाँकी श्रीमती ज्याक्लीनप्रति आभार व्यक्त गरेका छन् । सामग्री वितरणका क्रममा दातृ दम्पतीले यहाँको शैक्षिक सुधार र विद्यार्थीको भविष्यप्रति आफूहरू जिम्मेवार रहेको महसुस गरेको बताएका छन् । सम्भव भएसम्म यस्ता सहयोगमूलक कार्यक्रमलाई आगामी दिनमा पनि निरन्तरता दिने उनीहरूको प्रतिबद्धता छ । कार्यक्रममा विद्यालयका शिक्षक, अभिभावक, विद्यार्थी तथा स्थानीय सरोकारवालाहरूको उपस्थिति रहेको थियो ।










Discussion about this post