मंसिर ६, सोलुखुम्बु । सोलुखुम्बुको थुलुङ दुधकोशी गाउँपालिकाका तीन वटा वडामा ग्रामीण विद्युतीकरणलाई व्यवस्थित र दीर्घकालीन बनाउन करिब ५ करोड रुपैयाँको लागतमा विद्युत् पोल तथा तार व्यवस्थापन गरिने भएको छ । गाउँपालिकाका वडा नम्बर १ नेले, वडा नम्बर २ काँगेल र वडा नम्बर ३ पञ्चनमा विद्युत् सेवा थप व्यवस्थित, भरपर्दो र दिगो बनाउने उद्देश्यले नेपाल विद्युत् प्राधिकरणमार्फत आवश्यक सर्वेक्षण सुरु गरिएको गाउँपालिकाले जनाएको छ ।
यसअघि ती वडामा स्थानीय लघुजलविद्युत् आयोजनाबाट विस्तार गरिएको विद्युत् लाइनमा राष्ट्रिय प्रसारण लाइन जोडेर विद्युत् सेवा सञ्चालन हुँदै आएको थियो । तर, उक्त प्रणालीमा विभिन्न प्राविधिक समस्या देखिँदै आएकाले दीर्घकालीन समाधानका लागि पोल तथा तार व्यवस्थापनको योजना अघि बढाइएको गाउँपालिकाको भनाइ छ । करिब ५ करोड रुपैयाँ लागत अनुमान गरिएको उक्त आयोजना ठेक्का प्रक्रियामार्फत कार्यान्वयन गर्ने तयारी गरिएको छ । सोहीअनुसार हाल घरधुरी तथा बस्ती नछुट्ने गरी सर्वेक्षण कार्य भइरहेको छ । सर्वेक्षणलाई प्रभावकारी बनाउन सम्बन्धित वडाका निर्वाचित जनप्रतिनिधिहरू परिचालन गरिएको गाउँपालिकाले जनाएको छ ।
गाउँपालिकाले सर्वेक्षणका क्रममा आफ्नो टोल तथा बस्तीका कुनै पनि घरधुरी र क्षेत्र छुट्न नदिन स्थानीय बासिन्दालाई सक्रिय सहभागिता जनाउन आग्रह गरेको छ । यसैबीच, अन्य वडामा देखिँदै आएको विद्युत् आपूर्तिसम्बन्धी समस्या समाधानका लागि सबस्टेसन निर्माणको आवश्यक प्रक्रिया पनि अघि बढाइएको गाउँपालिकाले जानकारी दिएको छ ।
सबस्टेसन निर्माण तथा विद्युत् पूर्वाधार व्यवस्थापनका काम सम्पन्न भएपछि विद्युत् आउने–जाने समस्यामा न्यूनीकरण हुने अपेक्षा गरिएको छ । ग्रामीण क्षेत्रमा भरपर्दो विद्युत् सेवा विस्तार गरी नागरिकको जनजीवन सहज बनाउने र गाउँको समग्र विकासमा योगदान पुर्याउने लक्ष्यसहित गाउँपालिकाले विद्युतीकरणसम्बन्धी कामलाई प्राथमिकतामा राखेको जनाएको छ ।











Discussion about this post