साउन ३, साेलुखुम्बु । हिमाली जिल्ला सोलुखुम्बुमा सवारी कारवाहीबाट ३ वर्षमा झण्डै १ करोड १५ लाख रुपैयाँ राजस्व सङ्कलन भएको छ । जिल्ला ट्राफिक प्रहरी कार्यालय सोलुखुम्बुले आर्थिक वर्ष २०७८/७९ देखी आर्थिक वर्ष २०८०/८१ सम्म १ करोड १४ लाख ३१ हजार रुपैयाँ ट्राफिक कारवाही राजस्व सङ्कलन गरेको हो ।
तुलनात्मक रुपमा सवारी नियम उल्लङ्घन बढ्दै जादा सँगै बढ्दै गएको राजस्व असुली पनि उकालो लागेको छ । कार्यालयका प्रहरी सहायक हवलदार चन्द्र बस्नेतका अनुसार कार्यालयले आर्थिक वर्ष २०७८/७९ मा ४ हजार २ सय सवारी कारवाहीबाट ३१ लाख ६ हजार ५ सय रुपैयाँ राजस्व सङ्कलन गरेको थियो । यस्तै आर्थिक वर्ष २०७९/८० मा ४ हजार ८ सय ७२ सवारी कारवाहीबाट ४१ लाख ३३ हजार ५ सय सङ्कलन गर्दा यसपटक ४ हजार ९ सय ७१ सवारी कारवाहीबाट ४१ लाख ९२ हजार रुपैयाँ कारवाही राजस्व सङ्कलन गरेको हो ।
यसरी कार्यालयले ३ वर्षमा सवारी कारवाहीबाट मात्रै १ करोड १४ लाख ३२ हजार रुपैयाँ राजस्व सङ्कलन गरेको छ । यता ट्राफिक प्रहरी कार्यालय सोलुखुम्बुले दिएको तथ्याङ्क अनुसार जिल्लामा निरन्तर ट्राफिक राजस्व सङ्कलनमा वृद्धि भइरहेको छ । कार्यालयका सहायक हवलदार बस्नेतका अनुसार गत आर्थिक वर्ष २०७८/७९ र ७९/८० को तुलनामा यस वर्ष राजस्व सङ्कलनमा वृद्धि भएको हो ।
ट्राफिक प्रहरीले सवारी नियम उल्लङ्घन गर्ने हरु जस्तै तीब्र गतिमा चलाइएका, मादक पदार्थ सेवन गरेर चलाइएका, सवारी चालक अनुमति पत्र तथा सवारी दर्ता किताब ब्लुबुक विना चलाइएका, क्षमता भन्दा बढी यात्रु बोकेका तथा भार बोकेका लगायत नियम विपरित चलाइएको सावरीलाई कडाइका साथ कारवाही गर्दै आएको ट्राफिक प्रहरी नायब निरीक्षक कृष्ण कटवालले बताउनुभयो ।
Discussion about this post