शिक्षकहरूको परीक्षा लिँदै महाकुलुङ 

साउन ८, सोलुखुम्बु । सोलुखुम्बुको महाकुलुङ गाउँपालिकाले पालिका अनुदानमा कार्यरत शिक्षकहरूको करार अवधि थप गर्न परीक्षा लिदैँ छ ।  विभिन्न समयमा नियुक्ति गरिएका प्राथमिक तहका शिक्षकहरूको १ वर्षे करार अवधि थप गर्नका लागी गाउँपालिकाले परीक्षा प्रणाली अपनाएको हो ।

गाउँपालिकाका १४ वटा आधारभुत विद्यालयमा कार्यरत ३४ शिक्षकहरूको करार सेवा अवधि थप गर्नका लागी परीक्षा प्रणाली बाट गर्नुनपर्ने कार्यपालिकाको निर्णय बमोजिम आज परीक्षा लिइएको गाउँपालिकाका शिक्षा विकास अधिकृत झमक कटुवालले बताउनुभयो ।

परीक्षा प्रणाली मार्फत करार सेवा अवधि थप गर्दा शिक्षकहरूको ज्ञान, सीप र सेवा अनुशासनको जाँच हुने र त्यसले पठनपाठनलाई प्रभावकारी बनाउने भएकाले यस्तो प्रणाली सुरु गरिएको शिक्षा विकास अधिकृत कटवालको भनाई छ ।  शिक्षक सेवा आयोगले लिने परीक्षाको पाठ्यक्रममा आधारित रहेर पहिलो शिक्षक सेवा आयोगको पहिलो पत्रलाई आधार मानेर शिक्षकहरूको परीक्षा लिइएको जनाइएको छ । सहभागि शिक्षकहरूले करार सेवा अवधि थप गर्नका लागी १ सय पुर्णाङ्कमा ५० अङ्क ल्याउनु पर्ने हुन्छ ।

यही ५० अङ्क पनि ल्याउन नसके उनीहरू हरूको स्वतः करार अवधि खारेज हुने जनाइएको छ । यसरी करार अवधि थप गर्न शिक्षकहरूको ज्ञान सीपको परिक्षण गर्ने महाकुलुङ जिल्लाकै पहिलो पालिका हो ।