महाकुलुङका २ विपन्न परिवारलाई घर

साउन ९, सोलुखुम्बु ।  सोलुखुम्बुको महाकुलुङ गाउँपालिकाले विपन्न परिवारलाई घर दिएको छ । गाउँपालिकाको वडा नम्बर १ का अपाङ्गता भएका २ परिवारलाई घर निर्माण गरेर उपलब्ध गराएको हो ।  गरिव सँग उज्यालो कार्यक्रम अन्तर्गत गाउँपालिकाले अपाङ्गता भएका २ परिवार मछिन्द्रनाथ कुलुङ र नमिमाया कुलुङको परिवारलाई घर उपलब्ध गराएको गाउँपालिका अध्यक्ष सूर्य बहादुर कुलुङले बताउनुभयो ।

आर्थिक वर्ष २०८०/८१ को कार्यक्रम अन्तर्गत वडा नम्बर १ को बजेटबाट उनिहरु लाई घर निर्माण गरेर हस्तान्तरण गरिएको अध्यक्ष कुलुङले बताउनुभयो । शारीरिक रुपमा अशक्त र विपन्न २ परिवारलाई ६ लाख रुपैयाँ लागतमा पूर्ण व्यवस्थापन सहितको घर निर्माण गरेर उपलब्ध गराइएको वडा अध्यक्ष पर्खिधन राईले बताउनुभयो । १ छोरी सहित बसिरहेकी नमिमायाको लागी घर निर्माण गर्न वडा सदस्य बेदनारायण राईले जग्गा उपलब्ध गराउनुभएको छ ।

 भने अर्का विपन्न मछिन्द्रनाथको आफ्नै जग्गा घर निर्माण गरि हस्तान्तरण गरिएको अध्यक्ष राईले बताउनुभयो । उनीहरुको लागी बनाइएका घरमा चुल्हो, विजुली, शौचालय, किचन लगायत सबैको व्यवस्थापन गरिएको छ ।  नागरिकको गाँस, बास र कपासको जिम्मेवारी राज्यको भएपनि अहिले पनि चुहिने छानो मुनि धराशायी घरमा बसिरहेका महाकुलुङका विपन्नका लागी थोरै बजेको व्यवस्था गरेर घर निर्माण गर्दा उनीहरुलाई केही सहज हुने पालिका अध्यक्ष कलुङले बताउनुभयो । वडा नम्बर १ मा अझै पनि केही यस्तै विपन्न बर्गका नागरिकलाई घर आवश्यकता भएपनि बजेट अभावले काम गर्न कठिनाइ भइरहेको जनाइएको छ ।