खुम्बु प्रवेश गर्ने विदेशी पर्यटकको शुल्क ३ हजार

साउन १०, सोलुखुम्बु । हिमाली जिल्ला सोलुखुम्बुको खुम्बु पासाङल्हामु गाउँपालिका प्रवेश गर्ने विदेशीले अबदेखि नयाँ शुल्क तिर्नुपर्ने भएको छ । खुम्बु पासाङल्हामु गाउँपालिकाले आर्थिक ऐन २०८१ बमोजिम आर्थिक वर्ष २०८१/८२ का लागि नयाँ पर्यटन शुल्क निर्धारण गरेको हो ।

पर्यटकहरुको प्रवेश शुल्कबाट गाउँपालिकाले ४० प्रतिशतले राजश्व बृदि गराउने लक्ष्यका साथ शुल्क बृद्धि गरिएको पालिकाका प्रमुख प्रशासकीय अधिकृत जगतप्रसाद भुसालले जानकारी दिनुभयो । उहाँका अनुसार ट्रेकिङ एजेन्सीज एशोसिएसन अफ नेपाल (टान)लाई पत्र पठाउँदै नयाँ शुल्क निर्धारण गरेको हो ।

चालू आर्थिक वर्षमा खुम्बु गाउँपालिका क्षेत्र भित्र प्रवेश गर्ने सार्क क्षेत्र र चिनियाँ नागरिकले प्रति व्यक्ति २ हजार तथा अन्य विदेशी नागरिकले ३ हजार तिर्नुपर्ने व्यवस्था छ । उल्लेखित पत्र अनुसार कुटनीतिक विशिष्ट व्यक्ति र १० वर्ष मुनीका बालबालिकालाई कागजातको आधारमा निःशुल्क प्रवेशको व्यवस्था गरिएको छ ।