सोलुखुम्बुमा आत्महत्या बढ्यो, गत वर्ष ४६ जनाले गरे आत्महत्या 

साउन ११, सोलुखुम्बु  ।  हिमाली जिल्ला सोलुखुम्बुमा आत्महत्याको दर बढेको छ । आर्थिक वर्ष २०७९/८० को तुलनामा आर्थिक वर्ष २०८०/८१ म जिल्लामा आत्महत्याको दर बढेको हो । जिल्ला प्रहरी कार्यालय सोलुखुम्बुका अनुसार अघिल्लो आर्थिक वर्षको तुलनामा गत आर्थिक वर्ष २०८०/८१ मा आत्महत्याको सङ्ख्या ९ जनाले बढेको हो ।

जिल्लामा ७९/८० मा झुन्डिएर ३९, विष खाएर ५ र हाम फालेर २ जनाले आत्महत्या गरेका हुन । यस्तै ८० ८१ मा झुन्डिएर ३६ र विष खाएर १ जनाले आत्महत्या गरेको प्रहरीले जनाएको छ । कार्यालयका अनुसार आर्थिक वर्ष २०७९/८० मा जिल्लामा आत्महत्या सम्बन्धी घटना ३७ वटा भएकोमा ०८०/८१ मा ४६ वटा आत्महत्याका घटना भएका छन ।

 प्रहरीका अनुसार २०७९/८०मा सबैभन्दा धेरै आत्महत्या जिल्लाको एक मात्र नगरपालिका सोलु दुधकुण्ड नगरपालिकामा भएको छ ।  यहाँ १३ वटा आत्महत्या भएका थिए भने  गत आ/व ०८०/८१ मा सबै भन्दा धेरै आत्महत्या थुलुङ दुधकोशी गाउँपालिकामा भएको छ ।  कार्यालयका अनुसार गत आर्थिक वर्षमा उक्त गाउँपालिकामा १० वटा आत्महत्या भएका छन ।  गत आ/वमा जिल्लाको सोलुदुधकुण्ड नगरपालिकामा ९ वटा आत्महत्या भएका छन् । यस्तै सोताङमा ६ वटा, नेचासल्यानमा ३ वटा, खुम्बु पासाङ ल्हामुमा १ वटा, लिखुपिकेमा १ वटा र महाकुलुङमा ७ वटा आत्महत्या भएका छन् ।  

यस्तै आर्थिक वर्ष २०७९/८० मा जिल्लामा सोलुदुधकुण्डमा सबैभन्दा धेरै १३ वटा, थुलुङ दुधकोशी गाउँपालिकामा ७ वटा, सोताङमा २ वटा, नेचासल्यानमा ४ वटा, माप्य दुधकोशीमा ६ वटा, खुम्बुपासाङ ल्हामुमा १ वटा र महाकुलुङमा ४ वटा आत्महत्या सम्बन्धी घटना भएको जिल्ला प्रहरी कार्यालयका इन्स्पेक्टर प्रविण श्रेष्ठले जानकारी दिनुभयो ।